Qazaqstan men Qyrǵyzstan qorǵanys salasyndaǵy seriktestikti keńeıtpek

ASTANA. QazAqparat - QR Qorǵanys jáne aeroǵarysh ónerkásibi mınıstrliginiń delegatsııasy jumys saparymen Bishkekke baryp, áskerı vedomstvolarmen jáne mınıstrlik basshylarymen birqatar kezdesýler ótkizdi, dep habarlaıdy «QazAqparat» HAA tilshisi.

QR Qorǵanys jáne aeroǵarysh ónerkásibi mınıstri Beıbit Atamqulov Qyrǵyzstannyń Qorǵanys isteri boıynsha memlekettik komıtetiniń tóraǵasy Mırbek Qasymqulovpen kezdesti.

QR Qorǵanys jáne aeroǵarysh ónerkásibi mınıstrliginiń baspasóz qyzmetinen málim etkendeı, taraptar áskerı ónerkásip salasyndaǵy birlesken is-qımyl, sondaı-aq áskerı maqsattaǵy ónimderdi jetkizýdiń ózara perspektıvalaryn talqylady.

Atap aıtqanda, Qazaqstan delegatsııasy avıatehnıka (tikushaqtar tehnıkasyn jóndeý) salasyna qyzmet kórsetýde birlese jumys isteýdi jáne QR qorǵanys kásiporyndarynyń ónimderi men qyzmetterin usyndy. Sondaı-aq, Qyrǵyzstannyń Tótenshe jaǵdaılar mınıstrligine «Eýrokopter Qazaqstan ınjınırıng» JShS shyǵaratyn kópsalaly tikushaqtar jetkizý máselesiniń bolashaǵy qaraldy.

Qazaqstan delegatsııasy seriktesterine qazaqstandyq ǵarysh júıesin birlese qoldaný jáne ǵarysh salasyna qajet mamandardy daıyndaýdy usyndy.

Jumys saparyn qorytyndylaı kele mınıstr Beıbit Atamqulov qyrǵyzstandyq áriptesterin 23-25 mamyrda Astanada ótetin «KADEX-2018», V Halyqaralyq qarý-jaraq jáne áskerı-tehnıkalyq múlik kórmesine shaqyrdy.