Qazaqstan men Qyrǵyzstan kókpar týraly fılm túsirip jatyr
ASTANA. QazAqparat - Qazaqstan men Qyrǵyzstan akterleriniń qatysýymen «Kókpar» atty sporttyq drama-ekshnnyń túsirilimi bastaldy, dep habarlaıdy QazAqparat.
Kınokartına talantty kókpar oıynshysy, «Jalyn» komandasynyń kapıtany Maqsat jaıynda baıandaıdy. Mańyzdy bir kezekti oıyndaǵy jeńilisten keıin, «Jalyn» komandasynyń ıesi jaraqat alǵan atpen alańǵa shyǵýdan bas tartqan Maqsatty komandadan shyǵarý sheshimin jasaıdy. Óziniń aýylyna oralǵannan keıin jas jigit jańa komanda jınap, osy sporttyń bıik shyńyna jetýdiń aýyr jolyn bastaıdy.
Fılmniń rejısseri Rýslan Akýnnyń aıtýynsha, kınokartına sońǵy úlgidegi tehnologııalarmen túsirilýde. Sonymen qatar týyndydaǵy keıipkerlerdi Qazaqstan men Qyrǵyzstannyń úzdik akterleri somdaıtyn bolady.
«Kókpar» fılminiń basty rólderinde qazaqstandyq akter ári kaskader Asylhan Tólepov (Jaýjúrek myń bala) jáne aktrısa Gúlnaz Jolanova oınaıdy.
Belgili bolǵandaı, at ústindegi ári kaskaderlik trıýkterdi álemge tanymal «Nomad» toby oryndaıdy. Olar osyǵan deıin «Marko Polo» serıalyna tústi, sondaı-aq «Jaýjúrek myń bala», «Mońǵol» jáne ózge de fılmderde trıýkter jasady.
«QazAqparat» HAA tilshisine bergen suhbatynda Asylhan Tólepov atalǵan jobaǵa qatysý týraly usynysqa birden keliskenin aıtty.
«Kókpar - ol naǵyz erlerge arnalǵan sport túri. Túsirilimdi josparlaý kezinde men bul jobaǵa daıyn ekenimdi aıttym. Eger de unaǵan jobaǵa kirissem, onda ózimdi tolyqtaı fılmge arnaımyn. Osyǵan baılanysty Qazaqstannyń kókpardan jastar sporttyq lıgasy lagerinde jattyǵýdan óttim. Kásibı oıynshylarmen qatar oınaý úshin eleýli kúsh-jiger qajet boldy. Sondyqtan túsirilim alańynda maǵan qıyn bolmady. Fılmde Maqsat esimdi jigittiń rólin somdaımyn. Jalpy, osy keıipker maqsatyna jetýge talpynǵan jigerli adam retinde kórsetiledi», - dedi ol.
Avtor: Damır Baımanov
