Qazaqstan men Qyrǵyzstan depýtattary shekarada birlesken otyrys ótkizdi
Bul týraly QR Parlament Májilisiniń baspasóz qyzmeti habarlaıdy.
Qordaı aýylyndaǵy baqylaý-ótkizý pýnktterine barǵannan keıin Májilis jáne Qyrǵyz Respýblıkasy Jogorký Keneshi depýtattarynyń birlesken otyrysy ótti.
Іs-sharany ashqan Májilis tóraǵasynyń orynbasary Vladımır Bojko qaralyp otyrǵan máseleniń áleýmettik-ekonomıkalyq baǵytynyń mańyzdylyǵyn atap ótip, elimizdiń jáne kórshi Qyrǵyzstan azamattarynyń eskertýlerine nazar aýdardy.
Atap aıtqanda, olar shekara ótkizý pýnktterinde, ásirese jaz mezgilinde, áli kúnge deıin kezdesetin uzaq kezekke shaǵymdanýda. Kedendik rásimdeýdiń jáne shekarany baqylaýdyń baıaý júrgizilýi, jemqorlyq, kontrabanda jáne ınfraqurylymnyń tapshylyǵy faktileri de bar.
Otyrys barysynda QR Ulttyq qaýipsizdik komıteti tóraǵasynyń orynbasary - Shekara qyzmetiniń dırektory Darhan Dilmanov, QR Indýstrııa jáne ınfraqurylymdyq damý, Qarjy mınıstrlikteriniń, sondaı-aq Jambyl oblysy ákimdiginiń jáne qyrǵyz tarapynyń memlekettik organdarynyń ókilderi baıandama jasady.
Qazaqstandyq parlament ókilderi óz baıandamalarynda shekaradaǵy avtomobıl ótkizý pýnktteriniń jumysyn qamtamasyz etý salasyndaǵy vedomstvolary jumysynyń negizgi baǵyttary týraly tolyq aqparat berdi. Sonymen birge 2003 jylǵy 25 jeltoqsandaǵy Qazaqstan men Qyrǵyzstan úkimetaralyq memlekettik shekara arqyly ótkizý pýnktteri týraly kelisimge ózgerister engizý týraly hattamaǵa sáıkes ortalyq memlekettik jáne jergilikti atqarýshy organdar sheshetin mindetter de kórsetilgen.
Kezdesýde eki el depýtattary shekaralyq yntymaqtastyqty damytý týraly zańnamany jetildirý máselelerin talqylady.
Otyrysty qorytyndylaı kele, Májilis vıtse-spıkeri V. Bojko Memleket basshysy Qasym-Jomart Toqaevtyń ústimizdegi jyldyń 27 qarashasynda Qyrǵyzstanǵa jasaǵan memlekettik saparynyń nátıjelerin eskere otyryp, qyrǵyz tarapymen birlesken is-qımyl jasaý qajettigin atap ótti.
Shý ózeni arqyly ótetin QR «Qarasý» – Qyrǵyz Respýblıkasynyń «Aq-Tilek» ótkizý beketteriniń arasyndaǵy jańa kópir qurylysy týraly úkimetaralyq kelisimdi júzege asyrý, sondaı-aq «Besaǵash - avtojol» (Qazaqstan) jáne «Kıchı-Kapka - avtojol» (Qyrǵyzstan) ótkizý pýnktteriniń jumysyn jandandyrý, sondaı-aq «Kegen-avtojol» (Qazaqstan) men «Qarqyra-avtojol» (Qyrǵyzstan) ótkizý pýnktteriniń jumys ýaqytyn ulǵaıtý erekshe mańyzdy bolyp tabylady.
Otyrys barysynda Májilis vıtse-spıkeri shekara ótkizý pýnktteriniń tıimdiligin arttyrý jáne shekaradan ótý kezinde eki eldiń azamattary úshin qolaıly jaǵdaı jasaý maqsatynda osyndaı kezdesýlerdi jalǵastyrýdy usyndy. Sondaı-aq problemalyq máselelerdi sheshýdi turaqty túrde parlamenttik baqylaýda ustaý qajettigin aıtty.
Májilistiń Halyqaralyq ister, qorǵanys jáne qaýipsizdik komıteti uıymdastyrǵan shara ótkizý pýnktterine barý týraly birlesken kelisim aıasynda Qyrǵyzstan Respýblıkasynyń Jogorký Kenesh depýtattarynyń qatysýymen ótti.
