Qazaqstan men Qyrǵyzstan áskerleri «Saryshaǵan» polıgonynda oqý-jattyǵý ótkizýde
SARYShAǴAN. QazAqparat - Qaraǵandy oblysynyń «Saryshaǵan» polıgonynda «Jaýyngerlik dostastyq – 2019» oqý-jattyǵýy aıasynda Qazaqstan men Qyrǵyzstan áýe shabýylyna qarsy qorǵanysynyń (ÁShQQ) jaýyngerlik eseptoptary zenıttik-zymyran júıelerinen praktıkalyq oq atýlardy oryndaýda, dep habarlaıdy QazAqparat.
Jaýyngerlik jaǵdaıǵa barynsha jaqyndatylǵan kúıde, ıaǵnı shartty qarsylastyń qanatty zymyrandary men jaýyngerlik avıatsııasyn ımıtatsııalaıtyn nysandardy paıdalana otyryp, ÁShQQ áskerleri praktıkalyq atýlardy pysyqtaýda.
Áýe nysandaryn joıýǵa jaýyngerlik avıatsııa - MıG-31 joıǵyshy «áýe-áýe» zymyrandarymen birge qoldaý kórsetýde.
Oqý-jattyǵýǵa Áýe qorǵanysy kúshteri jeke quramynyń 1 myńnan asa áskerı qyzmetshisi men merzimdi qyzmettegi sarbazdar qatysýda. Olar ofıtserlik quram men kelisimshart qyzmetiniń áskerı qyzmetshilerinen alǵan bilimderin is júzinde qoldandy.
«Jaýyngerlik dostastyq – 2019» halyqaralyq oqý-jattyǵýy sheńberindegi praktıkalyq is-qımyldar, sondaı-aq Reseıdiń «Ashýlýk» polıgonynda ótýde.
Birlesken oqý-jattyǵý halyqaralyq áskerı yntymaqtastyqty nyǵaıtyp, TMD ÁShQQ birlesken júıesi aıasynda ózara is-qımyl júrgizýdiń tıimdiligin arttyrýda septigin tıgizedi.
