Qazaqstan men Qyrǵyzstan arasyndaǵy shekara máselesi 2013 jyly aıaqtalýy múmkin
ASTANA. 5 qarasha. QazAqparat - Qazaqstan men Qyrǵyzstan arasyndaǵy shekara máselesi 2013 jyly aıaqtalýy yqtımal.
Bul týraly búgin Parlament Májilisinde ótken Úkimet saǵatynda Jer resýrstaryn basqarý agenttiginiń tóraǵasy Qadyrhan Otarov málim etti.
Agenttik tóraǵasynyń aıtýynsha, Qazaqstannyń shekaralas 5 memleketpen qurlyqtaǵy shekarasynyń jalpy uzyndyǵy 13349 shaqyrymdy quraıdy. Qazirgi ýaqytta bul memlekettermen Memlekettik shekara týraly kelisimsharttarǵa qol qoıylǵan jáne olar ratıfıkatsııalanǵan.
«Qazaqstannyń shekarasy máselesine kelsek, búgingi tańda Qytaı Halyq Respýblıkasymen aradaǵy shekara jumystary tolyǵymen aıaqtalyp bitti. Ózbekstanmen aradaǵy dalalyq jumystar bitti, endi sońǵy satydaǵy qujattardy qabyldaý rásimderi júzege asýda. Túrkimenstanmen de dalalyq jumystar tolyq atqaryldy, degenmen kelisetin jerlerimiz áli de barshylyq. Atap aıtqanda Qazaqstan, Ózbekstan, Túrkimenstannyń, ıaǵnı úsh memlekettiń qosylatyn jerindegi aýdany 28 shaqyrymdy quraıtyn jerdi ózara kelisýge tıispiz. Degenmen, bunyń bári qurǵaqta emes, Kaspıı teńizi jaǵasyndaǵy jaǵalyq aımaqta tur. Qyrǵyz elimen de dalalyq jumystar negizinen bitti. Degenmen, áli de 50 shaqyrymǵa jýyq jerge baılanysty jumystar bar. Bul rette shekaraǵa qajetti qarajatty eki memleket birdeı shyǵarý kerek edi. Qyrǵyz tarapy osyny alǵa tartyp, 2012 jyly qarajattary joqtyǵyn aıtqan bolatyn. Sondyqtan da, bul shara 2013 jyly sheshilýi múmkin», - dedi Q. Otarov.
