Qazaqstan men Qyrǵyzstan arasynda shekara ýchaskelerine qatysty qujat bekitildi
ASTANA. QazAqparat – Búgin Májilistiń jalpy otyrysynda «Qazaqstan Úkimeti men Qyrǵyzstan Úkimeti arasyndaǵy shekaralyq ókilderdiń qyzmet ýchaskeleri týraly hattamany ratıfıkatsııalaý týraly» Zańy qabyldandy, dep habarlaıdy QazAqparat tilshisi.
Hattamanyń negizgi maqsaty – Qazaqstan Respýblıkasy men Qyrǵyz Respýblıkasynyń shekaralyq ókilderi óz fýnktsııalaryn oryndaýǵa jaýapty bolatyn memlekettik shekara ýchaskeleriniń aýmaqtyq shekterin aıqyndaý.
Hattamaǵa sáıkes Qazaqstan Respýblıkasynyń Úkimeti men Qyrǵyz Respýblıkasynyń Úkimeti mynadaı ýchaskelerdi aıqyndady:
Qazaqstan Respýblıkasynyń tarapynan – Almaty, Qordaı jáne Taraz ýchaskeleri, al Qyrǵyz Respýblıkasynyń tarapynan – Ystyqkól, Shý jáne Talas ýchaskeleri.
Májilistiń Halyqaralyq ister, qorǵanys jáne qaýipsizdik komıteti málimetine qaraǵanda, hattama eki el arasyndaǵy qatynastardyń quqyqtyq negizin belgileýge jáne retteýge baǵyttalǵan, Qazaqstan – Qyrǵyz memlekettik shekarasyndaǵy shekaralyq ókilderdiń qyzmet ýchaskelerin aıqyndaýdy kózdeıdi. Bul elimizdiń Memlekettik shekarasynyń belgilengen rejımin qoldaýǵa yqpal etetin bolady.
