Qazaqstan men Kýveıt tsıfrlandyrý salasyndaǵy yntymaqtastyqty kúsheıtpek
ASTANA. KAZINFORM — Qazaqstannyń Kýveıttegi elshisi Erjan Elekeev Kýveıttiń Aqparattyq tehnologııalar jónindegi ortalyq agenttiginiń (CAIT) Bas dırektorynyń mindetin atqarýshy Nadjat Hýseın Ibrahımmen kezdesti, dep habarlaıdy SІM baspasóz qyzmeti.
Kezdesý barysynda taraptar tsıfrlyq transformatsııa, elektrondyq úkimet jáne jasandy ıntellekt salalaryndaǵy yntymaqtastyq máselelerin talqylady.
Elshi Erjan Elekeev kýveıttik tarapty Qazaqstanda júzege asyrylyp jatqan tsıfrlyq reformalarmen tanystyryp, Jasandy ıntellekt jáne tsıfrlyq damý mınıstrliginiń qurylýy, sondaı-aq memlekettik qyzmetterdiń zamanaýı tsıfrlyq ekojúıesin damytý baǵytyndaǵy jetistikter týraly aıtty.
Sonymen qatar Qazaqstannyń BUU-nyń Elektrondyq úkimetti damytý ındeksinde 193 eldiń ishinde 24-orynda turǵany jáne onlaın memlekettik qyzmetterdi damytý boıynsha álemdegi jetekshi memleketterdiń qataryna kiretini atap ótildi.
Kezdesýde Memleket basshysy Qasym-Jomart Toqaevtyń bastamasymen 2026 jyldyń Tsıfrlandyrý jáne jasandy ıntellekt jyly bolyp jarııalanǵany da sóz boldy. Osyǵan baılanysty elimizde jasandy ıntellektti damytýǵa, tsıfrlyq ınfraqurylymdy jetildirýge jáne IT-mamandar daıarlaýǵa baǵyttalǵan keshendi jumystar júrgizilip jatqany aıtyldy.
Qazaqstan tarapy azamattar men bızneske myńnan astam memlekettik qyzmetti elektrondy formatta usynatyn ulttyq elektrondyq úkimet júıesiniń múmkindikterin tanystyrdy.
Óz kezeginde Kýveıt ókilderi memlekettik basqarýdy tsıfrlandyrý jáne elektrondyq qyzmetterdi damytý baǵytyndaǵy Qazaqstan tájirıbesine qyzyǵýshylyq tanytyp, elimizdiń jetistikterine joǵary baǵa berdi.
— Kezdesý qorytyndysy boıynsha taraptar eki eldiń beıindi vedomstvolary arasynda onlaın-kezdesý uıymdastyrýǵa, sondaı-aq tájirıbe almasý jáne praktıkalyq yntymaqtastyqty damytý maqsatynda ózara saparlardy pysyqtaýǵa kelisti, — delingen vedomstvo taratqan aqparatta.
CAIT — Kýveıttegi memlekettik sektordy tsıfrlyq transformatsııalaý, elektrondyq úkimetti damytý jáne ulttyq tsıfrlyq strategııany iske asyrýǵa jaýapty ýákiletti memlekettik organ.
Osydan buryn Qazaqstan men IT-alpaýyttary JI salasynda $10 mlrd-tyq kelisimderge qol qoıǵanyn jazǵanbyz.
