Qazaqstan men Kýáıt arasyndaǵy yntymaqtastyqty nyǵaıtý máseleleri sóz boldy
ASTANA. Maýsymnyń 25-i. QazAqparat - Búgin Qazaqstan Parlamentine Kýáıttiń Ulttyq Assambleıasynyń depýtattary keldi. Kýáıttiń Ulttyq Assambleıasynyń múshesi Ýalıd Musaıd ál-Tabtabaı bastaǵan delegatsııany QR Parlamenti Májilisi Tóraǵasynyń orynbasary Jánibek Káribjanov onyń ótinishi boıynsha qabyldady,
dep habarlaıdy QazAqparat.
Kezdesý barysynda Qazaqstan men Kýáıt arasyndaǵy yntymaqtastyqty nyǵaıtý, sonyń ishinde parlamentaralyq baılanysty damytý máseleleri sóz boldy. Eki el arasynda 1993 jyly dıplomatııalyq baılanys ornady. J.Káribjanov óz sózinde Qazaqstan Prezıdenti Nursultan Nazarbaevtyń 1997 jyly 31 tamyzdaǵy Kýáıtke jasaǵan alǵashqy resmı sapary eki eldiń arasyn jaqyndata túsip, jańa serpin bergenin aıtty. Sodan keıin saıası-ekonomıkalyq, rýhanı-mádenı baılanysy jańa úrdiste damydy. Qazir qarym-qatynas kóp salaly, birneshe baǵytta júrip jatyr.
Meıman Ýalıd Musaıd ál-Tabtabaı óz sózinde qazaq pen arabtardyń ózara uqsas qasıetteri kóp ekenin aıta kelip, Astanada birneshe mańyzdy kezdesýler ótkizgenin málim etti. Basty maqsat yntymaqtastyqty damytý ekenin, Kýáıt Qazaqstandy senimdi áriptesi dep biletinin jetkizdi.
Kezdesýde Islam konferentsııasy aıasynda parlamentaralyq baılanysty damytýdyń mańyzdylyǵy aıtyldy.
Bul kezdesýge Májilis depýtattary Qabıbolla Jaqypov, Jeksenbaı Dúısebaev jáne Murat Ahmádıev qatysty.
