Qazaqstan men Kot-d'Ivýar ózara baılanystaryn jandandyrýǵa ýaǵdalasty
ASTANA. QazAqparat - Astanada Qazaqstan Respýblıkasynyń Syrtqy ister mınıstri Qaırat Ábdirahmanov Kot-d'Ivýar Respýblıkasynyń Afrıkalyq ıntegratsııa jáne shet elderde turatyn ıvýarılikter isteri jónindegi mınıstri Elı Kýlıbalımen kezdesti, dep habarlaıdy QR SІM baspasóz qyzmeti.
Bul sapar qazaqstan-ıvýar qatynastary tarıhyndaǵy Kot-d'Ivýar ókiliniń Qazaqstanǵa joǵarǵy úkimetaralyq deńgeıde jasaǵan alǵashqy sapary bolyp tabylady.
Kezdesý barysynda mınıstrler ekijaqty yntymaqtastyqtyń saýda-ekonomıkalyq saladaǵy perspektıvalaryn jáne halyqaralyq uıymdar sheńberindegi ózara is-qımyldaryn talqylady.
Q. Ábdirahmanov dıplomatııalyq yntymaqtastyq ornatylǵan kezden bastap eki el arasynda dostyq baılanystardyń qalyptasqanyn, taraptardyń halyqaralyq arenadaǵy ózara qoldaý kórsetýlerin atap ótti. Kot-d'Ivýar Qazaqstannyń 2017-2018 jj. BUU-nyń Qaýipsizdik Keńesine turaqty emes músheligine kandıdatýrasyn qoldady, al Qazaqstan Kot-d'Ivýar-dyń 2018-2019 jj. BUU QK Turaqty emes músheligine qoldaý kórsetti.
Q. Ábdirahmanov kezdesý barysynda «Kot-d'Ivýar Qazaqstanmen taýar aınalymynyń kólemi boıynsha Afrıkanyń 55 memleketiniń ishinde 10-shy oryn alatyndyǵyn atap ótti. «Ol jaqsy kórsetkish, biraq saýda kólemin ári qaraı ósirýge barlyq negizdemeler bar», - dedi ol. Suhbattasýshylar eki memleket arasyndaǵy baılanystardy jandandyrýǵa ýaǵdalasty.
Taraptar eki eldiń Islam yntymaqtastyǵy uıymynyń sheńberindegi ózara is-qımyly arnaıy toqtaldy. Elı Kýlıbalı Kot-d'Ivýar Prezıdentiniń 2017 jylǵy 10-11 shildede Abıdjan qalasynda ótetin IYU Syrtqy ister mınıstrleri keńesiniń 44-shi sessııasyna shaqyrý hatyn tabys etti.
Óz kezeginde, Q.Ábdirahmanov QR Prezıdenti Nursultan Nazarbaevtyń Kot-d'Ivýar Prezıdenti Allasana Ýattarany 2017 jylǵy 10-11 qyrkúıekte Astanada ótetin IYU Bilim jáne tehnologııalar jónindegi birinshi sammıtine shaqyrýyn qaıtalap qýattady.
Qazaqstan men Kot-d'Ivýar dıplomatııalyq qarym-qatynastaryn 2009 jylǵy 25 mamyrda Damask qalasynda ótken IYU SІMK 36-shy sessııasy barysynda ornatty.
Búgingi tańda Kot-d'Ivýar dúnıejúzindegi birden-bir iri kakao jáne kofe óndirýshiler qatarynda. Sonymen qatar, atalǵan memleket banan, palmalyq maı, tabıǵı kaýchýk jáne t.b. eksporttaıdy.
2016 jyldyń qorytyndysyna sáıkes, Qazaqstan men Kot-d'Ivýar arasyndaǵy saýda aınalymy 2,7 mln dollardy quraıdy.
