Qazaqstan men Koreıa joǵary bilim jáne jasandy ıntellekt baılanysyn kúsheıtedi
ASTANA. KAZINFORM — Jalpy qol jetkizilgen kelisimder Qazaqstan men Koreıa Respýblıkasynyń joǵary oqý oryndary, ǵylymı uıymdary jáne tehnologııalyq kompanııalary arasyndaǵy tikeleı baılanysty keńeıtýge múmkindik beredi.
15 qyrkúıek kúni QR Prezıdenti Qasym-Jomart Toqaevtyń Koreıa Respýblıkasyna memlekettik sapary aıasynda Qazaq-koreı dóńgelek ústeli ótti. Іs-shara qorytyndysy boıynsha ǵylym, joǵary bilim, jasandy ıntellekt jáne joǵary tehnologııalar salalaryndaǵy ekijaqty yntymaqtastyqty damytýǵa baǵyttalǵan mańyzdy kelisimder toptamasy rásimdeldi.
QR Ǵylym jáne joǵary bilim mınıstrligi tarapynan vedomstvoaralyq, mekemearalyq jáne joǵary oqý oryndary arasyndaǵy yntymaqtastyqty qamtıtyn 40-tan astam qujatqa qol qoıyldy. Qol jetkizilgen kelisimder birlesken zertteýlerdi damytýǵa, tehnologııalyq yntymaqtastyqty nyǵaıtýǵa, eńbek naryǵynda suranysqa ıe mamandar daıarlaýǵa jáne eki eldiń akademııalyq baılanystaryn keńeıtýge baǵyttalǵan.
Yntymaqtastyqtyń negizgi baǵyttarynyń biri — sırek jáne jerde sırek kezdesetin metaldar salasyndaǵy birlesken jumys. Satbayev University bazasynda «Metallýrgııa jáne ken baıytý ınstıtýty» AQ, Koreıanyń Ónerkásiptik tehnologııalar ınstıtýty (KITECH) janyndaǵy Sırek metaldar jónindegi ulttyq ınstıtýty (KORAM) jáne eki eldiń beıindi uıymdarynyń qatysýymen Tehnologııalyq yntymaqtastyq ortalyǵyn qurý josparlanǵan. Tıisti ózara túsinistik týraly memorandým birlesken zertteýler júrgizýge, ozyq tehnologııalardy engizýge jáne sırek metaldar salasyndaǵy ónerkásiptik kooperatsııany damytýǵa negiz qalaıdy. Jobany iske asyrý eki eldiń ǵylymı-tehnologııalyq áleýetin biriktirip, yntymaqtastyqtyń praktıkalyq baǵytyn kúsheıtýge múmkindik beredi.
Jasandy ıntellekt jáne joǵary tehnologııalyq salalar úshin kadrlar daıarlaý baǵytyndaǵy ózara is-qımyl da jańa deńgeıge kóterilip keledi. A.Baıtursynuly atyndaǵy Qostanaı óńirlik ýnıversıteti men Dong-Eui ýnıversıtetiniń yntymaqtastyǵy aıasynda avtomobıl ónerkásibi salasynda birlesken jasandy ıntellekt zerthanasyn qurý josparlanǵan. Zerthana qoldanbaly zertteý jobalaryn iske asyrýǵa, jasandy ıntellekt negizindegi sheshimderdi engizýge jáne salanyń tehnologııalyq qajettilikterin eskere otyryp mamandar daıarlaýǵa múmkindik beretin ǵylymı alańǵa aınalmaq.
Ekijaqty yntymaqtastyqtyń mańyzdy baǵyttarynyń biri — KAIST Kazakhstan jobasy. Kezdesý qorytyndysy boıynsha ýnıversıtetti Koreıanyń jetekshi zertteý ýnıversıteti KAIST modeline sáıkes damytýǵa baǵyttalǵan qujatqa qol qoıyldy.
Jalpy qol jetkizilgen kelisimder Qazaqstan men Koreıa Respýblıkasynyń joǵary oqý oryndary, ǵylymı uıymdary jáne tehnologııalyq kompanııalary arasyndaǵy tikeleı baılanysty keńeıtýge múmkindik beredi. Jasandy ıntellekt, sırek metaldar, joǵary tehnologııalar jáne kadr daıarlaý salalaryndaǵy birlesken jobalar ǵylymı-bilim berý seriktestiginiń jańa, neǵurlym tereń ári praktıkalyq formatyna kóshýge negiz qalyptastyrady.
Qol jetkizilgen kelisimderdi iske asyrý strategııalyq seriktestikti odan ári nyǵaıtýǵa, Qazaqstannyń ǵylymı-tehnologııalyq áleýetin damytýǵa jáne joǵary bilim men ǵylym júıesiniń básekege qabilettiligin arttyrýǵa yqpal etedi.
Aıta ketelik Qazaqstan men Koreıa Alatau City ınfraqurylymyn birlesip damytady.
