Qazaqstan men Koreıa strategııalyq seriktestikti odan ári nyǵaıtady
ASTANA. KAZINFORM — Qasym-Jomart Toqaev pen Lı Chje Meń keńeıtilgen quramda kelissóz júrgizdi. Bul týraly Aqordanyń baspasóz qyzmeti habarlady.
Qazaqstan Prezıdenti Qasym-Jomart Toqaevtyń Koreıa Respýblıkasyna memlekettik sapary resmı delegatsııa músheleriniń qatysýymen ótken joǵary deńgeıdegi kelissózdermen jalǵasty.
Memleket basshysy Prezıdent Lı Chje Meńge Koreıaǵa shaqyrǵany úshin rızashylyǵyn bildirip, bul sapardyń mán-mańyzy erekshe ekenin atap ótti.
– Biz Koreıany halyqaralyq abyroı-bedeli zor memleket retinde jaqsy bilemiz. Sizdiń elińizdiń ekonomıka, ǵylym jáne tehnologııa salasyndaǵy orasan zor jetistikterin búkil álem moıyndaıdy, solardyń ishinde Qazaqstan da bar. Biz Koreıada júzege asyrylyp jatqan aýqymdy ózgeristerge kýá bolyp otyrmyz, oǵan úlken qyzyǵýshylyqpen qaraımyz. Muny Sizdiń parasatty saıasatyńyz ben koreı halqynyń qajyrly eńbeginiń jemisi dep sanaımyz. Al general Hon Bom Do jóninde álginde aıttym. Halqyńyz úshin generaldyń orny erekshe mańyzdy. Onyń ómir joly barshaǵa belgili. Ol koreı halqynyń naǵyz patrıoty, qaharmany dep aıtýǵa bolady. Generaldyń esimi Qyzylorda qalasyndaǵy kóshelerdiń birine berildi, sondaı-aq memorıaldyq keshen ashyldy. Qazaq halqy general Hon Bom Dony erekshe tarıhı tulǵa dep sanaıdy, – dedi Qazaqstan Prezıdenti.
Qasym-Jomart Toqaev eki el arasyndaǵy yntymaqtastyq buryn-sońdy bolmaǵan qarqynmen damyp kele jatqanyna nazar aýdardy.
– Byltyr telefon arqyly alǵash ret suhbattasyp, ózara senim men dostyqqa negizdelgen strategııalyq áriptestikti odan ári damytýǵa kelisken bolatynbyz. Al búgin ekijaqty qarym-qatynasymyzdy bolashaqqa baǵdarlanǵan jan-jaqty strategııalyq seriktestik deńgeıine kóterý jóninde mańyzdy ýaǵdalastyqqa qol jetkizdik, – dedi Memleket basshysy.
