Qazaqstan men Koreıa statıstıkada jasandy ıntellekt pen Big Data-ny birge damytpaq
ASTANA. KAZINFORM — Qazaqstan men Koreıa resmı statıstıka salasyndaǵy yntymaqtastyqty kúsheıtedi. Taraptar derekterdi tsıfrlandyrý, jasandy ıntellekt pen úlken derekterdi statıstıkada qoldaný baǵytynda birlesip jumys istemek. Bul týraly Ulttyq statıstıka bıýrosy málim etti.
Qazaqstan men Koreıa Respýblıkasy derekter jáne resmı statıstıka salasyndaǵy yntymaqtastyqty nyǵaıtýda14 qyrkúıekte Seýl qalasynda ótken alǵashqy «Ortalyq Azııa — Koreıa Respýblıkasy» sammıti aıasynda Qazaqstan Respýblıkasy Strategııalyq josparlaý jáne reformalar agenttiginiń Ulttyq statıstıka bıýrosy men Koreıa Respýblıkasynyń Derekter jáne statıstıka mınıstrligi arasynda yntymaqtastyq týraly Memorandýmǵa qol qoıyldy.
Qujatqa Ulttyq statıstıka bıýrosynyń basshysy Maqsat Turlybaev pen Koreıa Respýblıkasynyń Derekter jáne statıstıka mınıstri An Hendjýn qol qoıdy. Memorandým eki el arasyndaǵy ınstıtýtsıonaldyq áriptestikti odan ári nyǵaıtýǵa, ozyq bilim men tájirıbe almasýdy keńeıtýge, sondaı-aq zamanaýı derekter men resmı statıstıka salasyndaǵy birlesken bastamalardy júzege asyrýǵa baǵyttalǵan.
— Biz bul kelisimdi jaı ǵana resmı qujat retinde emes, uzaq merzimdi áriptestikti nyǵaıtýǵa, ozyq bilimmen almasýǵa jáne tsıfrlyq ekonomıkanyń jańa talaptaryna jaýap beretin zamanaýı statıstıkalyq júıeni birlesip damytýǵa jasalǵan mańyzdy qadam retinde qarastyramyz, — dep atap ótti Ulttyq statıstıka bıýrosynyń basshysy Maqsat Turlybaev.
Yntymaqtastyqtyń negizgi baǵyttarynyń biri statıstıkany tsıfrlyq transformatsııalaý bolady. Taraptar jasandy ıntellekt pen úlken derekterdi statıstıkada qoldaný, aqparattyń balamaly kózderin paıdalaný, statıstıkalyq taldaý ádisterin jetildirý, derekterdi jınaý jáne taratý úderisterin tsıfrlandyrý, sondaı-aq zamanaýı aqparattyq júıelerdi damytý baǵyttarynda ózara is-qımyldy jolǵa qoıýdy kózdeıdi.
Qazaqstan men Koreıa arasyndaǵy osy saladaǵy yntymaqtastyqtyń praktıkalyq negizi qazirdiń ózinde qalyptasqan. Aǵymdaǵy jyldyń maýsym aıynda Ulttyq statıstıka bıýrosynyń delegatsııasy Koreıa Respýblıkasyna oqý saparymen bardy. Qazaqstandyq mamandar statıstıkada jasandy ıntellekt pen úlken derekterdi qoldaný, derekterdi jınaý jáne taratýǵa arnalǵan aqparattyq júıelerdi damytý, sondaı-aq statıstıkalyq jáne geokeńistiktik aqparatty ıntegratsııalaý boıynsha koreıalyq tájirıbeni zerdeledi.
Osylaısha, qol qoıylǵan Memorandým jınaqtalǵan tájirıbeni sarapshylar men bilim almasýdy, birlesken is-sharalar men zertteýler ótkizýdi, sondaı-aq jańa jobalardy ázirleý men iske asyrýdy kózdeıtin júıeli yntymaqtastyq formatyna kóshirýge múmkindik beredi.
Qazaqstannyń koreıalyq tarappen halyqaralyq yntymaqtastyǵynyń taǵy bir mańyzdy baǵyty akademııalyq qaýymdastyqpen baılanysty. Buǵan deıin Bıýro Seýl ulttyq ýnıversıtetiniń Qoǵamdyq densaýlyq saqtaý joǵary mektebimen ózara túsinistik týraly Memorandýmǵa qol qoıǵan bolatyn. Bul áriptestik demografııa, statıstıka jáne qoǵamdyq densaýlyq saqtaý salalarynda birlesken zertteýlerdi damytýǵa baǵyttalǵan jáne Qazaqstandaǵy demografııalyq protsesterdi taldaý jáne boljaý ortalyǵynyń jumysy úshin erekshe mańyzǵa ıe.
Aıta keteıik, buǵan deıin Memleket basshysy Qasym-Jomart Toqaev Qazaqstannyń mıneraldy resýrstaryn ıgerýde Koreıamen jańa model usynǵan bolatyn.
