Qazaqstan men Koreıa Respýblıkasy birlesken 46 jobany iske asyryp jatyr
ASTANA. KAZINFORM – Ortaq bastamalardyń quny 4 mlrd dollarǵa jýyqtaıdy. Bul jóninde QR Ónerkásip jáne qurylys mınıstri Ersaıyn Naǵaspaev Qazaqstan-Koreıa birlesken komıssııasynyń saýda-ekonomıkalyq jáne ǵylymı-tehnıkalyq yntymaqtastyq boıynsha 11-otyrysynda málimdedi.
– Ótken jyldarda elderimiz ártúrli baǵyttardaǵy seriktestiktiń berik negizin qalady. Ásirese, ónerkásiptegi yntymaqtastyq qarqyndy órkendep keledi. Qazir birlesken 46 joba júzege asyp jatyr. Olardyń oryndalýy ártúrli deńgeıde, al jalpy quny – shamamen 4 mlrd AQSh dollary, - dedi ol.
Sonymen birge, mınıstr mashına qurastyrý, hımııa ónerkásibi, qurylys materıaldaryn óndirý salalaryndaǵy seriktestikti damytýǵa zor múmkindikter bar ekenin atap ótti. Onyń sózinshe, Astana ınvestıtsııa tartýǵa ǵana emes, sondaı-aq, óndiristi lokalızatsııalaýǵa, tehnologııa transferine jáne jańa ındýstrııalyq nysandar qurýǵa múddeli.
Aıta keteıik, buǵan deıin Qazaqstan men Koreıa Respýblıkasy arasyndaǵy saýda kólemi 3 mlrd dollardan asqanyn jazǵanbyz.
