Qazaqstan men Koreıa Respýblıkasy arasyndaǵy saýda kólemi 3 mlrd dollardan asty
ASTANA. KAZINFORM – Investıtsııa salasynda da oń nátıje baıqalyp otyr. Bul jóninde QR Ónerkásip jáne qurylys mınıstri Ersaıyn Naǵaspaev Qazaqstan-Koreıa birlesken komıssııasynyń saýda-ekonomıkalyq jáne ǵylymı-tehnıkalyq yntymaqtastyq boıynsha 11-otyrysynda málimdedi.
– Keıingi jyldarda Qazaqstan men Koreıa Respýblıkasy arasyndaǵy saýda-ekonomıkalyq yntymaqtastyq turaqty túrde ósip keledi. 2025 jyly ekijaqty saýda kólemi 3,17 mlrd AQSh dollary boldy. Investıtsııa salasynda jaqsy nátıje baıqalady. Koreıa Respýblıkasy – Qazaqstan ekonomıkasyna qarjy quıatyn negizgi ınvestorlardyń biri. Sońǵy 10 jylda Ońtústik Koreıa salǵan ınvestıtsııa 8 mlrd AQSh dollaryna jýyqtaıdy, - dedi ol.
Sonymen qatar mınıstr búginde elimizde Ońtústik Koreıanyń úlesi bar 700-den astam kompanııa jumys isteıtinin atap ótti. Olardyń qatarynda Hyundai Motor Company, Kia Corporation, Samsung Electronics, Lotte Corporation, Doosan Enerbility t.b. álemge tanymal korporatsııalar bar.
Aıta keteıik, buǵan deıin qazaqstandyq aýdıtorlar Ońtústik Koreıanyń ozyq tájirıbesin meńgergenin jazǵanbyz.
