Qazaqstan men Koreıa Prezıdentteri shaǵyn quramda kelissózder ótkizdi
Aqorda rezıdentsııasynda resmı qarsy alý rásiminen keıin memleketter basshylarynyń shaǵyn quramdaǵy kelissózderi ótti.
Qasym-Jomart Toqaev Prezıdent Mýn Chje Inniń alǵashqy memlekettik sapary Qazaqstan-Ońtústik Koreıa arasyndaǵy saıası dıalog pen ekonomıkalyq is-qımyldardyń damýyna serpin beretinin atap ótti. Qazaqstan Prezıdenti kún tártibindegi barlyq máselelerge qatysty tabysty kelissózder ótip, ekijaqty tıimdi sheshimder qabyldanatynyna senim bildirdi.
«Prezıdent myrza, Nur-Sultan qalasyna qosh keldińiz! Biz keshe eki jaqty yntymaqtastyqtyń mańyzdy máselelerin talqyladyq. Bul Sizdiń Qazaqstan Respýblıkasyna alǵashqy memlekettik saparyńyz. Keshe Siz ulttyq batyrlaryńyzdyń máıitterin Otanǵa qaıtarǵan mańyzdy rásimge qatystyńyz. Osy oqıǵaǵa oraı quttyqtaýymdy qabyl alyńyz», - dedi Memleket basshysy.
Prezıdent Mýn Chje In Qazaqstanǵa memlekettik saparmen shaqyryp, jyly qabyldaǵany úshin rızashylyǵyn bildirdi. Onyń aıtýynsha, bul sapar bıyl atap ótiletin Qazaqstan Respýblıkasy men Koreıa Respýblıkasy arasyndaǵy strategııalyq áriptestiktiń 10 jyldyǵy qarsańynda erekshe mańyzǵa ıe.
«Qazaqstan - Eýrazııa qurlyǵynda beıbitshilik ornatýǵa jáne ekonomıkalyq yntymaqtastyqty keńeıtýge baǵyttalǵan Koreıa Respýblıkasynyń «Jańa Soltústik saıasatyn» júrgizýdegi negizgi áriptesi. Meniń bul saparym ekijaqty qarym-qatynastardy ǵana emes, sonymen qatar, Koreıa Respýblıkasy men Ortalyq Azııa elderi arasyndaǵy kópjaqty ózara is-qımyldardy nyǵaıtýǵa serpin beredi dep úmittenemin», - dedi Ońtústik Koreıa Prezıdenti.
Kezdesýde taraptar saıasat, saýda-ekonomıkalyq, mádenı-gýmanıtarlyq salalaryndaǵy ekijaqty yntymaqtastyqty, sondaı-aq, eki eldiń halyqaralyq uıymdar aıasyndaǵy ózara is-qımyldaryn talqylady.
