Qazaqstan men Koreıa parlamentaralyq baılanystardy kúsheıtedi
ASTANA. KAZINFORM — Qazaqstan Respýblıkasynyń Koreıa Respýblıkasyndaǵy elshisi Aset Isenalı Koreıa Respýblıkasy Ulttyq Assambleıasynyń depýtaty Lı Chje Kanmen kezdesti, dep habarlaıdy QR SІM baspasóz qyzmeti.
Kezdesý barysynda taraptar Qazaqstan men Koreıa arasyndaǵy parlamentaralyq yntymaqtastyqtyń ózekti máselelerin, sondaı-aq saıası, saýda-ekonomıkalyq, ınvestıtsııalyq jáne gýmanıtarlyq salalardaǵy ózara is-qımyldy odan ári keńeıtý perspektıvalaryn talqylady.
Qazaqstan Respýblıkasynyń Prezıdenti Qasym-Jomart Toqaevtyń Koreıa Respýblıkasyna josparlanǵan sapary men onyń alǵashqy «Ortalyq Azııa - Koreıa Respýblıkasy» Sammıtine qatysýyna daıyndyq máselelerine erekshe nazar aýdaryldy. Áńgimelesýshiler aldaǵy joǵary deńgeıdegi baılanystar ekijaqty strategııalyq áriptestikti damytýǵa jáne birlesken jobalardy iske asyrýǵa qýatty serpin beretinine senim bildirdi.
Taraptar aldaǵy kópjaqty is-sharanyń óńiraralyq yntymaqtastyqty nyǵaıtýdaǵy jáne ekonomıka, ınvestıtsııalar, ınnovatsııalar men ornyqty damý salalaryndaǵy ortaq kún tártibin ilgeriletýdegi mańyzdy rólin atap ótti.
— Kezdesý barysynda qazaqstandyq dıplomat koreıalyq parlamentarııdi Qazaqstanda júrgizilip jatqan aýqymdy reformalar týraly aıtty. Atap aıtqanda, saıası júıeni odan ári jańǵyrtýǵa, memlekettik basqarý tıimdiligin arttyrýǵa, zań ústemdigin nyǵaıtýǵa, ornyqty ekonomıkalyq ósim men ınvestıtsııalar tartýǵa qolaıly jaǵdaı jasaýǵa baǵyttalǵan ózgerister jóninde aıtyp, Qazaqstannyń jańa Konstıtýtsııasynyń negizgi erejelerimen tanystyrdy, — delingen habarlamada.
Taraptar Qazaqstandaǵy koreı dıasporasynyń eki el halyqtary arasyndaǵy dostyqty, senimdi jáne ózara túsinistikti nyǵaıtýdaǵy biregeı rólin erekshe atap ótti. Kóptegen jyldar boıy koreı etnosy Qazaqstan men Koreıa arasyndaǵy berik dostyq kópiri bolyp keledi.
Kezdesý qorytyndysy boıynsha taraptar parlamentaralyq baılanystardy odan ári nyǵaıtýǵa, gýmanıtarlyq yntymaqtastyqty keńeıtýge jáne Qazaqstan Respýblıkasy men Koreıa Respýblıkasynyń múddelerine saı jańa birlesken bastamalardy ilgeriletýge ózara múddeliligin rastady.
Osyǵan deıin Koreıanyń Qazaqstandaǵy jańa elshisi senim gramotalarynyń kóshirmelerin tapsyrǵanyn jazǵan edik.
