Qazaqstan men Koreıa ǵarysh salasyndaǵy yntymaqtastyqty nyǵaıtyp jatyr
ASTANA. KAZINFORM — Qazaqstan «International Space Summit 2025» halyqaralyq kórmesine ulttyq stendpen qatysyp, ǵarysh salasyndaǵy sońǵy jetistikter men jahandyq damý perspektıvalaryn tanystyrdy.
Іs-sharaǵa memlekettik jáne jeke uıymdardyń ókilderi, ǵalymdar, ınvestorlar men dıplomattar qatysyp, ǵarysh tehnologııalaryn damytý men halyqaralyq yntymaqtastyqtyń negizgi baǵyttaryn talqylady.
Qazaqstan tarapynan forýmǵa Qazaqstannyń Ońtústik Koreıadaǵy elshisi Nurǵalı Arystanov, «Qazaqstan Ǵarysh Sapary» UK» AQ basqarma tóraǵasy Qaıyrjan Qojaev, «Galam» JShS dırektorynyń orynbasary Ádilsultan Lepes jáne Ionosfera ınstıtýtynyń dırektory Serik Nuraqynov qatysty.
Forýmnyń ashylýynda sóz sóılegen qazaq elshisi Qazaqstannyń ǵarysh salasyna sholý jasap, onyń el úshin strategııalyq mańyzdylyǵyn jáne odan ári damý áleýetin atap ótti. Sondaı-aq ol Qazaqstan aýmaǵynda ornalasqan Baıqońyr ǵarysh aılaǵy – álemdegi eń kóne jáne eń iri jumys istep turǵan ǵarysh aılaǵy ekenin eske saldy.
Elshi Qazaqstan Prezıdenti Qasym-Jomart Toqaevtyń Baıqońyr ǵarysh aılaǵynyń 70 jyldyǵyna arnalǵan beıneúndeýinde sońǵy onjyldyqtarda júzege asyrylǵan aýqymdy ǵarysh jobalarynyń ulttyq ekonomıkaǵa qosqan úlesin atap ótkenin jáne Baıqońyrdy halyqaralyq yntymaqtastyq, ǵylymı almasý, týrızm jáne bilim berý ortalyǵyna aınaldyrýǵa umtylatynyn jetkizdi.
Sondaı-aq elshi «Qazaqstan Ǵarysh Sapary» ulttyq kompanııasy koreı kompanııalarymen otandyq ǵarysh ınfraqurylymy men tehnologııalaryn damytý salasynda eń joǵary deńgeıdegi kelisimderge sáıkes yntymaqtastyqty damytyp jatqanyn habarlady. Ol Qazaqstannyń spýtnıktik baılanys sııaqty negizgi baǵyttarǵa ınvestıtsııa salýdy jalǵastyryp jatqanyn atap ótti.
Sonymen qatar ol elde «KazSat» baılanys spýtnıkteri men «KazEOSat» jerdi qashyqtyqtan zondtaý spýtnıkteri sátti jumys istep turǵanyn, olardyń telekommýnıkatsııalyq ınfraqurylym men keńistiktik monıtorıng júıesin damytýda mańyzdy ról atqaratynyn aıtty.
Sammıt aıasynda qazaqstandyq delegatsııa is-sharanyń negizgi uıymdastyrýshylarynyń biri bolǵan «Contec Space Group» kompanııasynyń Tóraǵasy Son Hı Lımen kezdesý ótkizdi. Kezdesý barysynda taraptar yntymaqtastyq ornatý múmkindikterin talqylap, ózara is-qımyldyń basqa da perspektıvalyq baǵyttary boıynsha pikir almasty.
Forýmǵa qazaqstandyq delegatsııanyń qatysýy eki eldiń ınnovatsııalyq jáne joǵary tehnologııalyq sektorlarda, sonyń ishinde aeroǵarysh ónerkásibinde seriktestikti tereńdetýge degen ósip kele jatqan qyzyǵýshylyǵyn rastady.
Aıta ketelik túrki elderi birlesip ǵaryshqa ushyratyn «CubeSat» spýtnıgi qaı baǵytta zertteý júrgizbek.