Qazaqstan men Koreıa eńbek kóshi-qony salasyndaǵy yntymaqtastyqty kúsheıtedi

SEÝL. KAZINFORM — QR Eńbek jáne halyqty áleýmettik qorǵaý birinshi vıtse-mınıstri Asqarbek Ertaev Seýlge jumys sapary barysynda Koreıa Respýblıkasynyń Eńbek jáne jumyspen qamtý mınıstriniń orynbasary Kvon Chan Chjýnmen, sondaı-aq Koreıa Respýblıkasynyń SІM Soltústik-Shyǵys jáne Ortalyq Azııa isteri departamentiniń bas dırektory Kan En Shınmen kezdesti. Taraptar eńbek kóshi-qony salasyndaǵy yntymaqtastyq máselelerin talqylady.

Kelissózderdiń basynda Asqarbek Ertaev sheteldik azamattardy jumyspen qamtýǵa ruqsat berý júıesine — Employment Permit System (budan ári — EPS) — Qazaqstannyń qosylýyna qatysty ótinishti qaraýdyń alǵashqy kezeńinde kórsetilgen qoldaý úshin koreı tarapyna alǵys bildirdi.

Kezdesý barysynda kelisýdiń kelesi kezeńiniń merzimderi jáne EPS júıesin is júzinde iske asyrý jónindegi ári qaraıǵy qadamdar qarastyryldy.

— Birinshi vıtse-mınıstr oqý bazasyn qurý, medıtsınalyq tekserýlerdi uıymdastyrý jáne EPS-TOPIK testileýin ótkizýge jaǵdaı jasaý boıynsha daıyndyq jumystarynyń aıaqtalǵanyn habarlady. Almaty oblysynda kandıdattardy kásibı daıarlaýdyń qajetti kólemin qamtamasyz ete alatyn úsh oqý ortalyǵy daıyndaldy. Medıtsınalyq tekserýler Qonaev qalasynyń kópsalaly qalalyq aýrýhanasynda júrgiziledi, al EPS-TOPIK testileýi Almatydaǵy Ulttyq testileý ortalyǵynyń bazasynda ótedi, — delingen habarlamada.

Asqarbek Ertaev eńbek kóshi-qony salasynda Koreıa Respýblıkasymen yntymaqtastyqtyń mańyzdylyǵyn atap ótip, qol jetkizilgen kelisimder Qazaqstan azamattary úshin zańdy ári qaýipsiz eńbek mıgratsııasy arnalarynyń damýyna yqpal etetinine senim bildirdi.

Eske sala keteıik, buǵan deıin Qazaqstan men Koreıa ǵarysh salasyndaǵy yntymaqtastyqty nyǵaıtyp jatqanyn jazǵan edik.