Qazaqstan men Koreıa bilimin toǵystyrǵan jańa qadam: QyzPU men SeoulTech seriktestigi
ASTANA. KAZINFORM — QyzPU men Ońtústik Koreıanyń SeoulTech ýnıversıteti bilim, ǵylym jáne tehnologııa salalaryndaǵy yntymaqtastyqty keńeıtedi. Taraptar Seýlde ótken «Ortalyq Azııa — Koreıa Respýblıkasy» sammıti aıasynda ózara yntymaqtastyq týraly memorandýmǵa qol qoıdy. Bul týraly Ǵylym jáne joǵary bilim mınıstrligi málim etti.
Qujat Seýlde ótken «Ortalyq Azııa — Koreıa Respýblıkasy» alǵashqy sammıti aıasynda jasaldy. Memorandým jasandy ıntellekt jáne tsıfrlyq bilim berý, STEM/STEAM, EdTech, ǵylymı-zertteý jobalary, akademııalyq utqyrlyq, sondaı-aq oqytýshylar men stýdentter arasynda tájirıbe almasý baǵyttaryndaǵy yntymaqtastyqty damytýǵa múmkindik beredi.
QR Ǵylym jáne joǵary bilim mınıstri Saıasat Nurbek atalǵan baǵyttardyń Qazaqstan men Koreıa arasyndaǵy bilim jáne ǵylym salasyndaǵy yntymaqtastyqty jańa deńgeıge shyǵarýdaǵy mańyzyn atap ótti.
QyzPU Basqarma tóraǵasy — rektor Beıbitkúl Kárimova seriktestiktiń ýnıversıtet úshin mańyzyn atap ótti.
— Biz úshin bul seriktestik tehnıkalyq jáne tehnologııalyq baǵyttardy pedagogıkalyq bilimmen ushtastyrýǵa múmkindik beredi. Memorandýmǵa qol qoıý — osy yntymaqtastyqtyń alǵashqy qadamy. Endigi mindet — qol jetkizilgen ýaǵdalastyqtardy naqty jobalarǵa aınaldyryp, stýdentter men oqytýshylar úshin jańa bilim berý jáne ǵylymı múmkindikter qalyptastyrý, — dedi Beıbitkúl Kárimova.
Seoul National University of Science and Technology (SeoulTech) — 1910 jyly qurylǵan Seýldegi ulttyq ýnıversıtet. Ýnıversıtet ınjenerııa, ǵylym jáne tehnologııa salalaryndaǵy praktıkalyq bilimdi ǵylymı zertteýlermen jáne ındýstrııamen ushtastyrýǵa baǵyttalǵan.
QyzPU úshin SeoulTech-pen seriktestik tehnıkalyq jáne tehnologııalyq baǵyttardy damytýǵa, zamanaýı tehnologııalardy pedagogıkalyq bilim berý júıesine engizýge jáne halyqaralyq akademııalyq baılanystardy keńeıtýge múmkindik beredi.
Memorandým eki ýnıversıtet arasyndaǵy uzaq merzimdi seriktestiktiń negizin qalyptastyryp, bilim, ǵylym jáne tehnologııa salalarynda birlesken jobalardy iske asyrýǵa jol ashady. Aldaǵy kezeńde qol jetkizilgen ýaǵdalastyqtardy naqty bastamalarǵa aınaldyryp, Qazaqstan men Koreıa arasyndaǵy akademııalyq jáne ǵylymı baılanystardy odan ári nyǵaıtý kózdeledi.
Eske sala keteıik, Qazaqstan Respýblıkasy men Koreıa Respýblıkasy syrtqy ister mınıstrleri bolashaqqa baǵdarlanǵan qazaq-koreı qarym-qatynasyn jan-jaqty strategııalyq seriktestik deńgeıine deıin kóterý týraly verbaldi notalar almasty. Qazaq-koreı kelisimderi energetıka, ǵylym, jumyspen qamtý jáne týrızm salasyn qamtydy.
