Qazaqstan men Koreıa áskerı yntymaqtastyqty jetildirmek

ASTANA. QazAqparat - QR Qorǵanys mınıstriniń orynbasary general-maıor Talǵat Muhtarov Koreıa Respýblıkasy Qorǵanys Mınıstrliginiń Áskerı barlaý agenttiginiń basshysy vıtse-admıral Pak Dong Výmen kezdesti, dep habarlaıdy mod.gov.kz.

General-maıor Talǵat Muhtarovtyń aıtýynsha, qaýipsizdik salasynda qalyptasqan búgingi jaǵdaı memleketterdiń ózara yntymaqtastyǵyn jetildirýdi qajet etip otyr.

 

«Dostas memleketterdiń qazirgi zamanǵy qaýip-qaterlerdi ýaqytynda eskertip, olarǵa der kezinde shara qoldaný maqsatynda tyǵyz qarym-qatynasta bolýy mańyzdy. Bul rette biz Astanadaǵy Koreıa elshilignen áskerı attasheniń ashylýyn qoldaımyz. Biz koreıalyq seriktesterimizdiń bul qadamyn qorǵanys salasyndaǵy ekijaqty qarym-qatynastardy jetildirýge degen umtylysy dep baǵalaımyz. Men osy qadamnyń bizdiń memleketterimizdiń yntymaqtastyǵynyń jańa kezeńi bolatyndyǵyna senimdimin»,-dedi Muhtarov.

 

Kezdesý barysynda eki eldiń áskerı yntymaqtastyǵynyń basym baǵyttary sóz boldy. Olardyń arasynda áskerı daıyndyq júıesin jetildirý jumystary aıasyndaǵy áskerı bilim berý, qorǵanys ónerkásibi keshenin damytý men qarý-jaraq jáne áskerı tehnıkalardy jańǵyrtýmen aınalysatyn birlesken kásiporyndar qurý sııaqty máseleler bar.