Qazaqstan men Koreıa arhıv isinde JI tehnologııalaryn qoldanbaq
ASTANA. KAZINFORM – QR Prezıdentiniń Arhıvi men Koreıa Respýblıkasynyń Ulttyq arhıvi yntymaqtastyq týraly jańa memorandýmǵa qol qoıdy. Qujat Memleket basshysynyń Koreıa Respýblıkasyna resmı sapary aıasynda qabyldanyp, eki mekeme arasyndaǵy on jylǵa jýyq áriptestiktiń jańa kezeńine jol ashty.
Memorandýmǵa QR Prezıdenti Arhıviniń dırektory Álııa Mustafına men Koreıa Respýblıkasy Ulttyq arhıviniń prezıdenti Lı En Chhýl qol qoıdy.
Qujat eki el arhıvshileri men zertteýshileriniń qujattardy birlesip izdeý jáne zerdeleý baǵytyndaǵy jańa jobalardy júzege asyrýyna múmkindik beredi.
Memorandým aıasynda mamandardyń tájirıbe almasýy men biliktiligin arttyrý, birlesken ǵylymı-zertteý jumystaryn júrgizý, halyqaralyq bilim berý jobalary men kásibı is-sharalarǵa qatysý kózdelgen.
Kezdesý barysynda taraptar arhıv isin tsıfrlyq turǵydan damytý jáne jasandy ıntellekt tehnologııalaryn qoldaný máselelerin de talqylady. Koreıa Respýblıkasy tsıfrlyq tehnologııalar men elektrondyq memlekettik basqarý salasynda ozyq tájirıbege ıe. Osyǵan baılanysty koreıalyq mamandarmen tájirıbe almasý qazaqstandyq arhıvshilerdiń jańa tehnologııalyq sheshimderdi meńgerip, olardy arhıv salasyna engizý múmkindigin keńeıtpek.
– Qazaqstan men Koreıa Respýblıkasyn ózara senimge negizdelgen, qarqyndy damyp kele jatqan dostyq qatynastar baılanystyrady. Eki arhıv arasyndaǵy yntymaqtastyq elderimiz arasyndaǵy kásibı jáne gýmanıtarlyq baılanysty nyǵaıtýdyń mańyzdy baǵyttarynyń birine aınalady dep senemin. Koreıa tarapynyń yntymaqtastyqqa degen nıetin joǵary baǵalaımyz. Búgin qol qoıylǵan memorandýmnyń naqty istermen jalǵasýyna múddelimiz. Aldaǵy ýaqytta birlesken jobalardy aıqyndap, jańa bastamalardy iske asyrýǵa kirisemiz dep senemiz, – dedi Álııa Mustafına.
Qazaqstan men Koreıa arhıvteri arasyndaǵy yntymaqtastyqtyń tarıhy on jylǵa jýyq ýaqytty qamtıdy. Ekijaqty baılanys 2016 jylǵy 28 qazanda QR Prezıdenti Arhıvi basshylyǵynyń Seýlge sapary kezinde bastalǵan. Sol kezde taraptar alǵashqy yntymaqtastyq týraly memorandýmǵa qol qoıǵan bolatyn.
2017-2019 jyldary QR Prezıdentiniń Arhıvi mamandary Koreıa Respýblıkasynda Records and Archives Management Program halyqaralyq baǵdarlamasy boıynsha birneshe ret taǵylymdamadan ótti. Qazaqstandyq mamandar elektrondyq qujattardy basqarý, tsıfrlyq saqtaý, qujattardy tsıfrlandyrý jáne arhıv materıaldaryn qalpyna keltirý baǵyttaryndaǵy koreıalyq tájirıbeni zerdeledi.
Koreıa arhıvshileri de Qazaqstanda uıymdastyrylǵan kásibı jobalarǵa turaqty qatysyp keledi. Koreıa Respýblıkasy Ulttyq arhıviniń ókilderi QR Prezıdentiniń Arhıvi ótkizgen Jas arhıvshilerdiń halyqaralyq jazǵy mektebinde sarapshy ári dárisker retinde elektrondyq qujattarmen jumys isteý jáne arhıv qorlaryn tsıfrlandyrý tájirıbesimen bólisti.
2022 jyly koreıalyq mamandar Qazaqstan arhıvshileriniń I Kongresine qatysyp, qujattardy basqarýdy standarttaý jónindegi tájirıbesin tanystyrdy.
Eki eldi qazirgi dıplomatııalyq jáne ekonomıkalyq baılanystarmen qatar ortaq tarıhı jady da baılanystyrady. QR Prezıdentiniń Arhıvinde Qazaqstandaǵy koreılerdiń tarıhyna jáne HH ǵasyrdyń mańyzdy kezeńderine qatysty qujattar saqtalǵan.
Bul materıaldar koreı dıasporasynyń tarıhyn, onyń Qazaqstanǵa qonys aýdarýyn, jańa ortaǵa beıimdelý úderisin jáne elimizdiń damýyna qosqan úlesin zertteýge múmkindik beredi. Osy turǵydan eki el arhıvteriniń yntymaqtastyǵy kásibı baılanystardy damytýmen qatar, ortaq tarıhı murany zertteý jáne saqtaý úshin de mańyzdy.
Aıta keteıik, Prezıdent Hanwha Group vıtse-tóraǵasy Kım Don Vondy qabyldady.
