Qazaqstan men Koreıa Alatau City ınfraqurylymyn birlesip damytady
ASTANA. KAZINFORM – Memleket basshysy Qasym-Jomart Toqaev pen Ońtústik Koreıa Premer-mınıstri Han Son Sýk Alatau Smart City jobalarymen tanysty. Bul týraly Aqordanyń baspasóz qyzmeti habarlady.
Іs-sharada zamanaýı ınfraqurylym jasaqtaý, ınvestıtsııaǵa qolaıly jaǵdaı jasaý, tsıfrlyq tehnologııalardy engizý jáne qaladaǵy qozǵalystyń jańa túrlerin ilgeriletý sekildi qalany damytýdyń negizgi baǵyttary tanystyryldy.
Koreılik seriktesterdi jobany júzege asyrýdyń naqty sharalaryna tartýǵa basa nazar aýdaryldy. Atap aıtqanda, KIND, KAIST jáne Korea Airports Corporation kompanııalarymen K-Smart qalashyǵyn qurý, bilim berý, R&D ınfraqurylymy, qalalyq áýe qozǵalysy, tsıfrlyq modeldeý, sondaı-aq jasandy ıntellekt tehnologııalaryn engizý salalarynda birlesken bastamalar usynyldy.
Budan bólek, qalanyń áýe qozǵalysyn basqarýdyń UAM/UTM júıesi tanystyryldy. Ol ushqyshsyz ushý apparattary men aerotaksıdi paıdalaný múmkindigin qarastyrady.
Alatau City jobasy qala qurylysy, bilim berý jáne zertteý, ónerkásip pen logıstıka, tsıfrlyq tehnologııalar, ınvestıtsııalyq yntymaqtastyq salalaryn biriktiretin ashyq halyqaralyq platforma sanalady.
Aıta ketelik Memleket basshysy Qazaq-koreı dóńgelek ústeliniń ashylýynda sóz sóılegen edi. Toqaev Qazaqstannyń mıneraldy resýrstaryn ıgerýde Koreıamen jańa model usyndy. Qazaqstan Koreıamen birlesken logıstıkalyq kásiporyn qurýdy usyndy.
