Qazaqstan men Koreıa 19 mlrd dollarlyq kelisimderge qol qoıdy

Qasym-Jomart Toqaev Koreıa Respýblıkasyna saparmen kelýge shaqyrǵany úshin Lı Chje Meńge rızashylyǵyn bildirdi.

– Koreıa Respýblıkasy Qazaqstannyń strategııalyq seriktesi sanalady. Halyqtarymyzdy erteden berik dostyq pen ózara túsinistik, tyǵyz mádenı-gýmanıtarlyq qarym-qatynas baılanystyrady. Elderimizdiń arasynda tek dostyq ornaǵan, eshqandaı daý joq. Aldymyzdaǵy maqsat – ekijaqty qatynastardy odan ári damytý. Búgin tańerteń jaqsy bıznes-forým ótti. Menimen birge Koreıaǵa úlken bıznes delegatsııa keldi. Ártúrli salada óte tartymdy jobalar júzege asyrylýda. Josparymyz da óte myqty. Onyń ishinde Alatau City jobasyn odan ári damytý máselesin jiti talqyladyq. Bul – shyn máninde óte qajetti jáne mańyzdy joba. Biz oǵan úlken mán beremiz. Qala mártebesine qatysty erejelerdi Konstıtýtsııamyzǵa engizdik. Zań turǵysynan koreılik kompanııalarǵa barlyq kepildik beriledi. Qazaqstanda koreı ultynyń 120 myńnan astam ókili turady. Olarǵa barlyq jaǵdaı jasalǵan, koreı dıasporasy – qoǵamymyzdyń belsendi músheleri, – dedi Prezıdent.

Memleket basshysy koreı generaly Hon Bom Doǵa arnaıy toqtaldy.

– Hon Bom Donyń tarıhymen jaqsy tanyspyn. Ol – naǵyz qaharman, otansúıgish tulǵa. Ony jadymyzda saqtaý úshin ózara parasatty is atqardyq dep aıtýǵa negiz bar. Bul oqıǵaǵa júz jyldan asa ýaqyt ótip ketse de, koreı halqy óz generalyn umytpaǵany tańǵalarlyq jaıt. Batyrdy este qaldyrý úshin onyń súıegin otanyna qaıtaryp, azamattyq paryzymyzdy oryndadyq, – dedi Qasym-Jomart Toqaev.

Prezıdent eki eldiń túrli baǵyttaǵy yqpaldastyǵynyń qazirgi jaı-kúıi men keleshegin joǵary baǵalady.

– Ekijaqty qarym-qatynasqa toqtalsaq, sapar barysynda 19 mıllıard dollardy quraıtyn kommertsııalyq kelisimderge qol qoıyldy. Koreı ınvestorlarynyń jumysyna kóńilimiz tolady, aldaǵy ýaqytta da osy baǵyttaǵy baılanystardy jalǵastyramyz. Qonaq úı, munaı óńdeý zaýytyn salý jáne qala qurylysy boıynsha jaqsy josparlarymyz bar. Ásirese, mádenı-gýmanıtarlyq yntymaqtastyqty nyǵaıtýǵa den qoıamyz, – dedi Memleket basshysy.

Koreıa Respýblıkasynyń Prezıdenti Qazaqstan basshysyna iltıpat bildirip, onyń Seýlge jasaǵan saparyna aıryqsha mán beretinin atap ótti.

– Koreıa tarıhynda aıryqsha orny bar jáne qıyn-qystaý kezeńde halqyna qorǵan bolǵan general Hon Bom Donyń súıegin qaıtarý jóninde sheshim qabyldaǵanyńyzǵa alǵys aıtamyn. Qazaq halqy kezinde jer aýdarylǵan koreılerge pana boldy. Osy oraıda Sizge jáne qazaq halqyna rızashylyǵymyzdy bildiremiz, – dedi Lı Chje Meń.

Kelissóz barysynda eki eldiń júıeli baılanysty úzbeýge, bir-birine jan-jaqty qoldaý kórsetýge daıyn ekenderi aıtyldy.

Kezdesý qorytyndysy boıynsha memleketter basshylary Qazaqstan men Koreıa Respýblıkasynyń strategııalyq seriktestigin nyǵaıtýǵa jáne ony jańa ári naqty mazmunmen tolyqtyrýǵa nıetti ekenin rastady.