Qazaqstan men Qytaı alǵash ret sý resýrstary salasynda Memorandýmǵa qol qoıdy

ASTANA. KAZINFORM – Qazaqstan men Qytaıdyń sý vedomstvolary alǵash ret sý resýrstary salasynda ózara túsinistik pen yntymaqtastyq týraly Memorandýmǵa qol qoıdy. Bul týraly QR Sý resýrstary jáne ırrıgatsııa mınıstrligi málim etti. 

Beıjińde QR Premer-Mınıstriniń birinshi orynbasary Roman Sklıar men QHR Memlekettik Keńesi Premeriniń orynbasary Dın Sıýesıannyń tóraǵalyǵymen ótken Qazaqstan-Qytaı yntymaqtastyq komıtetiniń XII otyrysynda tıisti kelisimge qol qoıyldy.

Memorandýmǵa QR Sý resýrstary jáne ırrıgatsııa vıtse-mınıstri Nurlan Aldamjarov pen QHR Sý sharýashylyǵy mınıstriniń orynbasary Lı Lıanshen qol qoıdy. Qujat sýdy utymdy jáne turaqty paıdalaný, zamanaýı tehnologııalardy engizý, balamaly sý kózderin bólý jáne ony ıgerý, sondaı-aq tájirıbe almasý jáne birlesip maman daıarlaý baǵyttaryndaǵy ekijaqty yntymaqtastyqty nyǵaıtýdy kózdeıdi.

— Bir jyl buryn meniń QHR-ǵa jumys saparym aıasynda biz Qytaı tarapymen yntymaqtastyq jáne ózara túsinistik týraly Memorandýmǵa qol qoıý týraly ýaǵdalastyq. Qos tarap birden kelisim jobasyn ázirleýge kiristi. Sý resýrstary máselelerindegi yntymaqtastyq mańyzdy resýrsty tıimdi paıdalanýǵa, sýdy esepke alý men únemdeýdiń ozyq tehnologııalaryn engizýge, sý salasy mamandarynyń biliktiligin arttyrýǵa yqpal etedi, — dedi Sý resýrstary jáne ırrıgatsııa mınıstri Nurjan Nurjigitov.

Eske sala keteıik, buǵan deıin elimizdiń sý qoımalaryndaǵy jaǵdaı qandaı ekenin jazǵan bolatynbyz.