Qazaqstan men Qytaıdyń Makao arnaıy ákimshilik aımaǵy elderi ózara vızadan bosatý týraly kelisimge qol qoıdy

ASTANA. KAZINFORM - «Qazaqstan Respýblıkasynyń Úkimeti men Qytaı Halyq Respýblıkasynyń Makao arnaıy ákimshilik aımaǵynyń úkimeti arasyndaǵy el azamattaryn vızalyq talaptardan bosatý týraly kelisimge» qol qoıý rásimi 9 sáýirde Makao arnaıy ákimshilik aımaǵynda ótti.

Bul týraly Makao arnaıy ákimshilik aımaǵynyń úkimettik aqparattyq bıýrosy málim etti.

Kelisimge eki taraptyń atynan Qazaqstannyń Qytaıdaǵy Elshisi Shahrat Nuryshev pen Qytaıdyń Makao arnaıy ákimshilik aımaǵynyń ákimshilik-quqyqtyq jumys departamentiniń basshysy Chjan ıÝnchýn qol qoıdy.

Joǵaryda atalǵan kelisim kúshine engennen keıin Qazaqstan Respýblıkasynyń jaramdy tólqujattarynyń ıeleri Makao aımaǵyna vızasyz kirip, 14 kúnge deıin bola alady. Sonymen birge, jaramdy Makao arnaıy ákimshilik aımaǵynyń pasporttary bar Makao turǵyndary da Qazaqstan Respýblıkasyna vızasyz kire alady jáne 14 kúnge deıin bola alady. Biraq, sapar maqsaty – týrızm ne tranzıt bolýy tıis. Qazaqstandyqtar Makaoǵa, Maka azamattary Qazaqstanǵa oqýǵa, jumys isteýge nemese sol elde turýǵa vızasyz bara almaıdy.

Qol qoıý rásimine Qazaqstan Respýblıkasynyń Gonkongtaǵy Bas konsýly Almas Seıtaqynov ta qatysqan.

2023 jylǵy 10 qarashadan bastap Qazaqstan men Qytaı arasyndaǵy shekteýli vızasyz rejım engizilip, onyń aıasynda azamattardyń 30 kún merzimge kórshiles elge barýyna ruqsat berilgen bolatyn. Alaıda, bul ruqsattyń Qytaıdyń arnaıy ákimshilik aýdandary – Gonkong pen Makaoǵa qatysy bolmaǵan.

Qazirgi tańda qazaqstandyqtar Gonkongqa 14 kúnge vızasyz bara alady, al Makaoǵa barý úshin vıza qajet.