Qazaqstan men Qytaıdyń energetıkadaǵy yntymaqtastyǵy: birlesken jobalar qandaı nátıje beredi
ASTANA. KAZINFORM — Qos memleket energetıka sektoryndaǵy seriktestikti kúsheıtedi. Bul týraly eki eldiń mamandary Energetıkalyq jabdyq salasynda tehnıkalyq yntymaqtastyq jónindegi Qytaı-Qazaqstan forýmynda talqylady.
Elordada ótip jatqan eki kúndik is-shara aıasynda Jasyl energetıka jabdyqtaryna servıstik qyzmet kórsetý ortalyǵynyń tanystyrylymy ótti. Bul keshen QHR-nyń Tsındao qalasynda «Qytaı — ShYU» saýda-ekonomıkalyq ınstıtýty janynan ashyldy. Ol elektr stantsııalarynyń energııa tıimdiligin arttyrý jáne energııa tutyný kólemin qysqartý úshin Qazaqstan men Ortalyq Azııanyń basqa da elderindegi elektr stantsııalaryna keshendi jańǵyrtý qyzmetterin kórsetpek.
Ortalyq qyzmetine China Service Technology (Shandong) Co., Ltd. kompanııasy jetekshilik etedi, al onyń Qazaqstandaǵy ókili retinde CSTC Kazakhstan kompanııasy jumys isteıdi.
Jańa ortalyqtyń Qazaqstan úshin mańyzy qandaı
Forýmda jańa keshenniń tıimdiligi jóninde QR Energetıka mınıstrligi Elektr energetıkasy salasyn damytý departamenti quramyndaǵy bólim basshysy Sultan Asylqanov málimdeme jasady. Aldymen ol eki eldiń arasyndaǵy baılanysyna jáne Qazaqstannyń aldaǵy maqsattaryna toqtaldy.
— Qazaqstan men Qytaıdy jan-jaqty ári berik strategııalyq áriptestik baılanystyrady. Ekijaqty yntymaqtastyǵymyzda, ásirese, energetıka salasy mańyzdy oryn alady. Búginde energetıkalyq jobalardy damytýmen qatar, tehnologııalyq ózara is-qımylǵa, jabdyqtardyń senimdiligin arttyrýǵa jáne olarǵa tehnıkalyq qyzmet kórsetýdi jetildirýge erekshe mán berilýde. Qazaqstannyń energetıka salasynyń aldynda qoldanystaǵy qýattardy jańǵyrtý, elektr energııasyn óndirý tıimdiligin arttyrý jáne energetıkalyq ınfraqurylymnyń turaqty jumysyn qamtamasyz etý mindetteri tur. Osyǵan baılanysty zamanaýı tehnıkalyq sheshimderge, sapaly servıstik súıemeldeýge jáne jabdyqtardyń búkil qyzmet etý merzimi boıy qosalqy bólshekterdiń qoljetimdi bolýyna suranys artyp otyr, — dedi Sultan Asylqanov.
Sonymen qatar, onyń sózinshe, ashylǵan ortalyq qazaqstandyq jáne qytaılyq kásiporyndar arasyndaǵy yntymaqtastyqty damytýdyń naqty múmkindigi bolmaq. Naqtyraq aıtqanda, servıstik qyzmetterdi Qazaqstanda kórsetýge kóshý, tehnıkalyq tájirıbe almasý, jergilikti mamandardy daıarlaý jáne elimizdegi kásibı quzyretterdi damytý tárizdi máselelerge basa mán berilmek.
Al «Samuryq-Energo» AQ Óndiris jónindegi basqarýshy dırektory Ǵalymbek Áýtálipov búginde Qazaqstannyń energetıka salasynda aýqymdy mindetter oryndalyp jatqanyn atap ótti. Onyń málimdeýinshe, ósip kele jatqan ekonomıkany senimdi energııamen qamtamasyz etý, generatsııalaıtyn qýattardy jańartý, olardyń tıimdiligin arttyrý jáne neǵurlym taza energetıkaǵa kezeń-kezeńimen kóshý qajet. Al mundaı jaǵdaıda jabdyqtarǵa olardyń búkil qyzmet etý merzimi boıy senimdi tehnıkalyq qyzmet kórsetýdiń mańyzy erekshe artady.
— Qazaqstanda energetıkalyq jabdyqtardy jetekshi óndirýshilerdiń quzyretterin biriktiretin ortalyqtyń ashylýy — salalyq yntymaqtastyqty damytýdaǵy mańyzdy qadam. Elimizde servıstik múmkindikterdi damytý, kadrlar daıarlaý jáne tájirıbe almasý búkil energetıka salasyna oń áserin tıgizedi. Qytaı Halyq Respýblıkasy — bizdiń burynnan kele jatqan senimdi seriktesimiz. Al energetıka eki el arasyndaǵy yntymaqtastyqtyń negizgi baǵyttarynyń biri bolyp qala beredi, — dedi Ǵalymbek Áýtálipov.
Qytaı tarapy qandaı ustanymda
Joǵaryda Jasyl energetıka jabdyqtaryna servıstik qyzmet kórsetý ortalyǵy Tsındao qalasyndaǵy «Qytaı — ShYU» saýda-ekonomıkalyq ınstıtýtyny janynan ashylǵanyn jazdyq. Jıynǵa atalǵan oqý ornynyń dırektory Chjen Shı de qatysty. Ol baıandamasynda eki el arasyndaǵy kóp jyldan beri jalǵasyp kele jatqan jaqsy qarym-qatynas jóninde sóz qozǵady.
— Dál osy Qazaqstanda 2013 jylǵy qyrkúıekte Qytaı Halyq Respýblıkasynyń Tóraǵasy Sı Tszınpın Jibek jolynyń ekonomıkalyq beldeýin qurý bastamasyn alǵash ret kóterdi. Sondyqtan Qazaqstanmen yntymaqtastyq biz úshin erekshe mańyzǵa ıe. Energetıka salasynda bizdiń elderimizdiń ózara is-qımyl jasaýyna berik negiz jáne birin-biri tolyqtyratyn múmkindikter bar. Bizdiń ortaq mindetimiz — osy áleýetti kásiporyndardyń qajettilikterin óteıtin jáne eki eldiń energetıka salasynyń damýyna yqpal etetin naqty jobalarǵa aınaldyrý, — dedi Chjen Shı.
Onyń sózinshe, jańadan ashylǵan ortalyq saladaǵy naqty máselelerdi sheshýmen aınalysady. Atap aıtqanda, jasyl energetıkadaǵy seriktestik, qurylǵylar men tehnologııalardy almasý, qajettilikke baılanysty mamandar daıarlaý tárizdi sharýalar atqarylady.
Sózimizdi túıinder bolsaq, Jasyl energetıka jabdyqtaryna servıstik qyzmet kórsetý ortalyǵy Qazaqstandaǵy jáne elektr stantsııalary men energetıkalyq kásiporyndarǵa qyzmet kórsetedi. Sonymen qatar, otandyq mamandar atalǵan ortalyqta taǵylymdamadan ótip, biliktiligin arttyrady.
Aıta keteıik, buǵan deıin Qazaqstan men Qytaı «Qorǵas» ortalyǵyndaǵy qaýipsizdikti kúsheıtetinin jazǵanbyz.
