Qazaqstan men Qytaı zııankesterge qarsy birlesken monıtorıng júrgizedi
ASTANA. KAZINFORM — AShM-de QHR-men agrarlyq metrologııa, standarttar júıesin ózara taný jáne aqparattyq tehnologııalardy engizý salalaryndaǵy ózara is-qımyl máseleleri talqylandy. Kezdesý «Bir beldeý — bir jol» bastamasy aıasynda ekijaqty yntymaqtastyqty keńeıtý maqsatynda ótti.
Kezdesýge AShM AÓK-degi memlekettik ınspektsııa komıtetiniń tóraǵasy Sáken Qanybekov, sondaı-aq Ulttyq agrarlyq ǵylymı-bilim berý ortalyǵynyń ókilderi qatysty.
Qytaı delegatsııasynyń quramynda ShUAR Naryqty qadaǵalaý jáne basqarý bıýrosy bas dırektorynyń orynbasary Chjý Sın, Shyńjań metrologııa jáne synaq ınstıtýtynyń, Sapa ınfraqurylymyn damytý ınstıtýtynyń, EAVISION Robotic Technologies kompanııasynyń, «SUNKAR EAVISION» JShS-niń qyzmetkerleri boldy.
Kelissózder barysynda taraptar qaýipti zııankesterdiń, sonyń ishinde úıirli shegirtkelerdiń taralýyna jol bermeý boıynsha júıeli jumystarǵa erekshe nazar aýdardy. Bul baǵyttaǵy sharalar eki el aýmaǵynda da, shekara mańy óńirlerinde de júzege asyrylýda.
Aýyl sharýashylyǵy alqaptaryn jedel monıtorıngteýge jáne nysanaly óńdeý júrgizýge múmkindik beretin ushqyshsyz ushý apparattaryn paıdalaný máseleleri qaraldy.
Kezdesý aıasynda qatysýshylar transshekaralyq zııankester monıtorıngi salasyndaǵy qazirgi jaǵdaı týraly aqparat almasyp, drondardy qoldanýdyń praktıkalyq qyrlaryn, sondaı-aq ólsheý, synaq júrgizý jáne qoldanylatyn jabdyqtyń tıimdiligin baǵalaý máselelerin talqylady.
Kezdesý qorytyndysy boıynsha taraptar fıtosanıtarııalyq qaýipsizdik máseleleri birlesken kúsh-jigerdi úılestirýdi talap etetinin atap ótti. Tıimdi monıtorıng, derektermen jedel almasý jáne ozyq tehnologııalardy engizý agrarlyq sektordyń turaqty damýy men aýyl sharýashylyǵy daqyldaryn qorǵaýdyń negizgi sharttary bolyp tabylady.
Qol jetkizilgen ýaǵdalastyqtar Qazaqstan men Qytaı arasyndaǵy áriptestik ulttyq jáne óńirlik deńgeıde fıtosanıtarııalyq qaýipsizdikti nyǵaıtýǵa yqpal etetinin rastaıdy.
