Qazaqstan men Qytaı jol salasynda halyqaralyq standarttardy birlesip ázirlemek
ASTANA. KAZINFORM – Qazaqstan men Qytaı jol qurylysy salasynda halyqaralyq standarttardy ázirleý jáne jańa tehnologııalardy engizý baǵytynda yntymaqtastyqty kúsheıtip jatyr.
21-22 sáýir kúnderi Astana jáne Almaty qalalarynda «Qazaqstan jol ǵylymı-zertteý ınstıtýty» AQ (QazjolǴZI) men Qytaı Halyq Respýblıkasynyń ǵylymı-tehnologııalyq uıymdary arasynda birqatar jumys kezdesýleri ótti. Kelissózder barysynda QHR Kólik mınıstrliginiń Avtomobıl joldary ǵylymı-zertteý ınstıtýty (RIOH) delegatsııasymen ISO aıasynda halyqaralyq standarttardy birlesip ázirleý máseleleri talqylandy.
– Taraptar jol salasynda halyqaralyq standarttardy ázirleý, zamanaýı tehnologııalardy engizý jáne sapa talaptaryn úılestirý baǵytynda birlesken jumysty kúsheıtýge ýaǵdalasty. Sonymen qatar avtomobıl joldaryn paıdalaný erekshelikterin eskere otyryp, kelisilgen tásilder qalyptastyrý máselesi qarastyryldy. Qytaılyq seriktestermen jańa materıaldardy synaý, olardy Qazaqstannyń klımattyq jaǵdaılaryna beıimdeý, sondaı-aq ınnovatsııalyq sheshimderdi engizý tetikteri talqylandy. Atap aıtqanda, «Almaty – Shelek – Qorǵas» avtojolyndaǵy tozýǵa tózimdi GT-8 asfalt qabaty qoldanylǵan tájirıbelik ýchaskeniń nátıjeleri qaralyp, onyń paıdalaný kórsetkishterine monıtorıng júrgizilip jatqany aıtyldy, – delingen Kólik mınıstrliginiń habarlamasynda.
Kezdesýler barysynda jol-qurylys materıaldaryn qoldaný, ınfraqurylymdy tekserýdiń zamanaýı ádisteri, tsıfrlyq tehnologııalardy engizý, sondaı-aq kópirlerdiń qyzmet etý merzimin uzartý máseleleri de kóterildi.
Yntymaqtastyq aıasynda jol qozǵalysy qaýipsizdigin baǵalaý, halyqaralyq avtotasymaldy damytý, ıntellektýaldy kólik júıelerin engizý jáne «jasyl» tehnologııalardy ilgeriletý baǵyttary basymdyq retinde belgilengen.
Taraptar ǵylymı zertteýler júrgizý, pılottyq jobalardy iske asyrý, tájirıbe almasý jáne birlesken ınfraqurylymdyq bastamalardy damytý boıynsha jumysty jalǵastyrýǵa nıetti.
Aıta keteıik, buǵan deıin jol ınfraqurylymyn saqtaý úshin jańa tehnologııalar engiziletini habarlandy.
