Qazaqstan men Qytaı jylyna 3 mln tonnaǵa deıin bolat óndiretin kombınat salýǵa nıetti
ASTANA. KAZINFORM – Fýtszıan provıntsııasynda óndiristerdi Qazaqstanda ornalastyrý jáne qytaılyq jańa kásiporyndardy iske qosý máseleleri talqylanyp jatyr. Josparlanǵan ınvestıtsııa kólemi 1,2 mlrd AQSh dollaryna deıin jetýi múmkin.
Bul týraly Qazaqstan Respýblıkasynyń Saýda jáne ıntegratsııa mınıstri Arman Shaqqalıevtiń Fýtszıan provıntsııasyna jasaǵan jumys saparynyń qorytyndysy boıynsha málim boldy. Sapar aıasyndaǵy basty kelisimderdiń biri – qytaılyq Fujian Hengwang Investment kompanııasymen iri ınvestıtsııalyq jobany júzege asyrý máselesin pysyqtaý.
Joba Qazaqstanda jylyna 3 mln tonnaǵa deıin bolat óndiretin metallýrgııalyq kombınat salýdy kózdeıdi. Investıtsııa kólemi shamamen 1,2 mlrd AQSh dollary. Kásiporyn iske qosylǵan jaǵdaıda shamamen 2,5 myń jańa jumys orny ashylady. Ónim negizinen ishki naryqqa baǵyttalyp, sondaı-aq eksportqa shyǵarylmaq.
Sonymen qatar Qazaqstanda birqatar sala boıynsha óndiristerdi jergiliktendirý jobalary qarastyrylyp jatyr. Jinyuan toqyma kompanııasymen jip ıirý óndirisin iske qosý jáne shıkizatty tereń óńdeý baǵyttary talqylanyp jatyr. Weihua Heavy Machinery kompanııasymen júk kótergish jabdyqtar shyǵaratyn óndiris pen ınjenerlik ortalyqtar qurý máselesi qaralyp jatyr.
Shenda Electric kompanııasymen transformatorlar men elektrotehnıkalyq ónimder óndirisin uıymdastyrý múmkindigi talqylansa, Jinlun Hi-tech Fiber kompanııasymen sıntetıkalyq talshyqtar men hımııalyq óńdeý salasyndaǵy jobalar pysyqtalyp jatyr.
Jalpy alǵanda, bul bastamalar Qazaqstan aýmaǵynda qosylǵan quny joǵary óndirister tizbegin qalyptastyrýǵa, jańa tehnologııalardy engizýge, óndiristi jergiliktendirýge jáne syrtqy naryqtarǵa shyǵýǵa baǵyttalǵan.
– Fýtszıan – Qytaıdyń jetekshi ónerkásiptik ári eksporttyq óńirleriniń biri. Biz Qytaımen tutas el retinde emes, naqty provıntsııalar deńgeıinde jumys isteımiz. Osy óńirdiń porttary arqyly qazaqstandyq ónimder Qytaıdyń ońtústigine jáne ASEAN elderiniń naryǵyna shyǵýǵa múmkindik alady, – dedi Arman Shaqqalıev.
QazTrade deregine sáıkes, 2025 jyly Qazaqstan men Fýtszıan provıntsııasy arasyndaǵy taýar aınalymy shamamen 522 mln AQSh dollaryna jetken.
Aıta keteıik, Qazaqstan men Qytaı arasynda Tsındaoda $125 mln kelisimge qol qoıyldy.
Qazaqstan Qytaıǵa eksportty arttyryp jatyr.
