Qazaqstan men Qytaı ýshý sporty boıynsha yntymaqtastyqty kúsheıtip jatyr
ASTANA. KAZINFORM — Sport salasyndaǵy baılanysty tereńdetý maqsatynda «Ýshý dostyqty nyǵaıtady: órkenıetter dıalogy» is-sharasy ótti. Jıynda qazaqstandyq jáne qytaılyq ýshý sheberleri kópshilikke ónerin pash etip, atalǵan sporttyń ádis-tásilderin kórsetti.
Sonymen qatar, basqosýda mamandar ýshýdyń mańyzy jóninde pikir bildirdi. Olardyń sózinshe, atalǵan sport qos memleket arasyndaǵy jan-jaqty seriktestikke, ózara qarym-qatynasqa oń áserin tıgizedi.
— Bul kezdesý eki el arasyndaǵy dostyq pen qarym-qatynasty nyǵaıtyp, ýshý ónerin damytýǵa, tájirıbe almasýǵa jáne bolashaqtaǵy birlesken jobalardy júzege asyrýǵa jańa múmkindikter ashady. Qazaqstan men Qytaı arasyndaǵy yntymaqtastyq tek ekonomıka, energetıka, saýda nemese kólik salalarymen shektelmeı, mádenı jáne sporttyq baǵyttardy da qamtyp otyr, — dedi QR Týrızm jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Amanbaı Nurmuhanbetov.
Sonymen birge, ol ýshýdyń tarıhyna toqtaldy. Atalǵan sport — ǵasyrlar boıy jetilip, búginge jetken mádenı mura.
Ýshý — tek jaýyngerlik óner nemese sport túri ǵana emes, adamnyń jan dúnıesi men tán saýlyǵyn úılestiretin, izgilikke, tártipke, ózin-ózi jetildirýge úndeıtin ómirlik fılosofııa. Sondyqtan álem halyqtary arasynda keń taralǵan.
— Qazaqstan úshin ýshý jańa sport baǵyty retinde damyp keledi. Qazaqstandyq sportshylar ýshý boıynsha Azııa jáne álemdik deńgeıdegi jarystarǵa qatysyp júr. Olar halyqaralyq jarystarda joǵary nátıje kórsetip, álemdik jáne qurlyqtyq dodalarda el namysyn abyroımen qorǵap júr, — dedi Amanbaı Nurmuhanbetov.
Al Qytaıdyń Qazaqstandaǵy elshisi Han Chýnlın jıynda qazaq jáne qytaı sportshylarynyń birlesip óner kórsetýi mádenı baılanys pen dostyqtyń sımvoly ekenin atap ótti.
— Qytaıdyń ýshýy men qazaqtyń ulttyq sport túrleriniń erejeleri ózgeshe bolǵanmen, rýhanı jaǵynan uqsaıdy. Sebebi, olar adamdy fızıkalyq turǵyda kúsheıtip, minezin shyńdaıdy, qaısar etip qalyptastyrady. Búgin Qytaı men Qazaqstannyń ýshý boıynsha sportshylary sheberligin bir kilemde, birge kórsetti. Mundaı is-sharalar dostyqty nyǵaıtady, — dedi ol.
Aıta keteıik, buǵan deıin ýshýdan tarıhı altyn alǵan sportshy jetistiginiń syryn aıtqanyn jazǵanbyz.
