Qazaqstan men Qytaı tehnıkalyq jáne kásiptik bilim berýde ózara yntymaqtastyq máselelerin talqylady
ASTANA. KAZINFORM – QR Oqý-aǵartý mınıstri Ǵanı Beısembaev QHR bilim mınıstri Hýaı Tszınpenmen kezdesti, dep habarlaıdy mınıstrliktiń baspasóz qyzmeti.
Eki tarap tehnıkalyq jáne kásiptik bilim berý salasynda Qazaqstan-Qytaı yntymaqtastyǵyn nyǵaıtý máselelerin talqylady.
Atap aıtqanda, kezdesýde qos dıplomdyq bilim berý men birlesken bilim berý baǵdarlamalaryn júzege asyrý, eki eldiń stýdentteri men oqytýshylarynyń taǵylymdamadan ótýi, kolledjderdi ınnovatsııalyq damytý boıynsha birqatar jobany júzege asyrý týraly aıtyldy.
«Qazaqstan úkimeti eńbek naryǵynda suranysqa ıe mamandyqtar boıynsha bilikti maman daıyndaýǵa asa kóńil bólýde. Búginde tehnıkalyq jáne kásiptik bilim berý uıymdarynda qazaqstandyq stýdentterdiń 65%-ǵa jýyǵy tegin bilim alýda. Kásiporyndardyń tapsyrysy boıynsha jumysqa ornalastyrý mindettemesimen kadrlardy maqsatty ázirleý, sondaı-aq elimizdiń árbir makroóńiriniń tapsyrysy boıynsha kolledjderdi beıindeý júrgizilýde. Qazaqstandyq kolledjder halyqaralyq akkredıtatsııalaýdan ótýde. Biz bul baǵyttaǵy jumysty áli de kúsheıtýdi kózdep otyrmyz», — dedi Ǵanı Beısembaev.
Esterińizge sala keteıik, elimizde 772 kolledjde 540 myńnan astam stýdent bilim alýda. Sońǵy bes jyl ishinde memlekettik tapsyrys kólemi eki esege jýyq artty, onyń ishinde 70 paıyzy tehnıkalyq mamandyqtarǵa baǵyttaldy. 518 kásiporyn 410 kolledjdi óziniń qamqorlyǵyna alyp, keńes quramynda kolledjerdi basqarýǵa qatysyp keledi. Sonymen qatar jumysshy mamandyqtardyń mártebesin arttyrý, álemdik úzdik kásibı standarttar men tájirıbelerdi engizý maqsatynda elimizde jyl saıyn WorldSkills chempıonaty ótkizilýde. Ótken jyly óz tarıhynda tuńǵysh ret bizdiń stýdentterimiz EuroSkills halyqaralyq dodasynda tamasha kórsetkishke qol jetkizdi.
