Qazaqstan men Qytaı taýar aınalymynyń qarqyndy ósimi baıqalyp tur – Roman Sklıar

ASTANA. KAINFORM - Qazaq-qytaı yntamaqtastyǵy aıasynda 45 iri ınvestıtsııalyq joba júzege asyrylyp jatyr. Bul týraly búgin elordada Qazaqstan-Qytaı iskerlik keńesinde Premer-Mınıstrdiń birinshi orynbasary Roman Sklıar aıtty.

«Osy keńes - Qazaqstan men Qytaı arasyndaǵy tıimdi yntymaqtastyqty qamtamasyz etýge baǵyttalǵan mańyzdy alań. Qytaı – Qazaqstannyń basty strategııalyq saýda jáne ınvestıtsııalyq seriktesteriniń biri. Eki el arasynda senim dıalogy ornap, ózara is-qımyldyń joǵary deńgeıine qol jetkizilgen. Byltyr Qazaqstan men Qytaı arasyndaǵy ózara saýda kólemi 30 paıyzdan astam artyp, rekordtyq 41 mlrd dollarǵa jetti», - dedi R. Sklıar.

Bul turǵyda ol osy jyly da taýar aınalymynyń qarqyndy ósimi baıqalyp turǵanyn aıtty.

«Keıingi 20 jylda Qytaıdan Qazaqstanǵa tartylǵan tikeleı ınvestıtsııa kólemi 25 mlrd dollarǵa jýyqtady. Qazirgi kezde Qazaqstanda 4 myńnan asa qytaı kapıtaly qamtylǵan kompanııa tirkelgen. Munymen qosa, qazaq-qytaı yntamaqtastyǵy aıasynda 45 iri ınvestıtsııalyq joba júzege asyrylyp jatyr», - dedi Úkimet basshysynyń birinshi orynbasary.

Budan buryn habarlanǵandaı, búgin atalǵan iskerlik keńes aıasynda QR Syrtqy ister mınıstrligi Investıtsııa komıtetiniń tóraǵasy Ǵabıdolla Ospanqulov Qazaqstan men Qytaı arasyndaǵy jobalarǵa túsinik berdi. 

Forým barysynda Qazaqstan men Qytaı arasynda 5,2 mlrd dollar somasyndaǵy qujattarǵa qol qoıyldy.