Qazaqstan men Qytaı taý-ken metallýrgııasynda birlesken jobalardy iske asyrady
ASTANA. KAZINFORM — Qazaqstan Respýblıkasynyń Premer-mınıstri Oljas Bektenov qytaılyq Zijin Mining Group kompanııasy dırektorlar keńesiniń tóraǵasy Chen Tszınhemen ınvestıtsııalyq yntymaqtastyq máseleleri boıynsha kezdesý ótkizdi. Bul týraly Úkimettiń baspasóz qyzmeti málim etti.
— Memleket basshysynyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynda qoıylǵan ekonomıkany ártaraptandyrý jónindegi mindetter sheńberinde taý-ken metallýrgııa kesheniniń jobalaryn júzege asyrýǵa nazar aýdaryldy, — delingen habarlamada.
Qazaqstan — altyn óndirý boıynsha 6-shy jáne qorlar boıynsha 13-shi orynda. Búgingi tańda Qazaqstannyń JІÓ-degi taý-ken metallýrgııa sektorynyń úlesi 8%-dy quraıdy, metallýrgııa ónimin shyǵarý kólemi jylyna 14 trln teńgeden asady. Salada 224 myńǵa jýyq adam jumys isteıdi. Ótken jyly sektorǵa $3 mlrd kóleminde ınvestıtsııa tartyldy.
Kezdesý barysynda Aqmola oblysynda TMK salasyndaǵy iri ınvestıtsııalyq jobany júzege asyrý boıynsha birlesken sharalar qaraldy. Sonymen qatar geologııalyq barlaý jáne jańa ken oryndarynyń áleýetin ashýdaǵy ózara tıimdi yntymaqtastyqtyń keleshegi atap ótildi.
Premer-mınıstr Oljas Bektenov Qazaqstan Úkimeti qosylǵan quny joǵary ınvestıtsııalyq jobalardy júzege asyrýǵa qajetti járdem kórsetetinin atap ótti. Seriktestik paıdaly qazbalardy óndirý kóleminiń ósýine, turaqty jumys oryndaryn qurýǵa jáne óndiristiń ozyq, ekologııalyq turaqty tehnologııalaryn engizýge yqpal etýi tıis.
Óz kezeginde Zijin Mining Group dırektorlar keńesiniń tóraǵasy Chen Tszınhe elimizdegi ınvestıtsııalar úshin qolaıly jaǵdaı jasaý boıynsha júrgizilip jatqan jumystarǵa oń baǵa berip, Qazaqstanmen yntymaqtastyqty nyǵaıtýǵa múddelilik bildirdi.
Zijin Mining Group — metallýrgııa salasyndaǵy álemdegi eń iri kompanııalardyń biri, 15 elde 30 jobany júzege asyrady. Taý-ken konglomeraty Forbes Global 2000 tiziminde 778 jáne Fortune China 500 tiziminde 77 orynda. Kompanııanyń aktsııalary Gonkong pen Shanhaı qor bırjalarynda kórsetilgen.
Aıta keteıik, Astanada Halyqaralyq Araldy qutqarý qory basqarmasynyń II otyrysy ótti.