Qazaqstan men Qytaı taldaý ortalyqtarynyń forýmy: Senim men yntymaqtastyqtyń jańa kezeńi
ASTANA. KAZINFORM — Astanada «Senimge negizdelgen dıalogtan ortaq jetistikterge» atty Qazaqstan men Qytaıdyń taldaý ortalyqtarynyń II forýmy ótti. Іs-sharany Qazaqstan Respýblıkasynyń Prezıdenti janyndaǵy Qazaqstan strategııalyq zertteýler ınstıtýty (QSZI) men Qytaı qoǵamdyq ǵylymdar akademııasynyń Reseı, Shyǵys Eýropa jáne Ortalyq Azııa ınstıtýty (QQǴA RShEOAI) uıymdastyrdy.
Forým eki eldiń jetekshi taldaý ortalyqtarynyń, memlekettik ınstıtýttarynyń, ǵylymı qaýymdastyqtarynyń jáne dıplomatııalyq orta ókilderin jınap, ekijaqty yntymaqtastyqtyń ózekti máselelerin talqylaýǵa jáne ózara árekettestiktiń strategııalyq baǵyttaryn aıqyndaýǵa arnalǵan mańyzdy alańǵa aınaldy.
Qytaı qoǵamdyq ǵylymdar akademııasynyń (QQǴA) prezıdenti Gao Sıan Forýmǵa qatysýshylarǵa joldaǵan jazba hatynda «taldaý ortalyqtary – ınnovatsııalardyń ınkýbatory ári saıasat qalyptastyrý zerthanasy, ekijaqty qatynastardyń turaqty damýyna yqpal etetin basty faktor» ekenin atap ótti.
QQǴA prezıdenti sondaı-aq Qytaı men Qazaqstannyń taldaý ortalyqtary arasyndaǵy yntymaqtastyqty nyǵaıtýǵa, dıalogty ilgeriletýge, senim ornatýǵa jáne birlesken damýǵa baǵyttalǵan bastamalardy usyndy.
Forýmnyń ashylýynda sóz sóılegen QSZI dırektory Jandos Shaımardanov Qazaqstannyń ınnovatsııalyq ekonomıkaǵa ótýi máselesinde Qytaı tájirıbesiniń praktıkalyq qundylyǵyn erekshe atap ótti.
– Búginde Qytaı jańartylatyn energııa kózderi, robototehnıka jáne jasandy ıntellekt salalarynda jetekshi oryn alyp, ınnovatsııalyq ekonomıkaǵa sátti transformatsııa úlgisin kórsetýde. Tehnologııalyq jańǵyrtý men ónimdilikti arttyrýdy kózdeıtin Qazaqstan úshin osy tájirıbege súıený óte mańyzdy. Biz tsıfrlyq sheshimder men ınvestıtsııa sheshýshi ról atqaratyn jańa qosylǵan quny joǵary salalar qurýǵa umtylamyz. Osy turǵyda Qytaımen strategııalyq seriktestik birlesken damýǵa, ekonomıkalyq turaqtylyqty nyǵaıtýǵa jáne naryqtarymyzdy ártaraptandyrýǵa múmkindikter ashady,– dep atap ótti QSZI dırektory.
QQǴA RShEOAI dırektory Sýn Chjýanchjı óz sózinde Qytaıdyń halyqaralyq quqyqty nyǵaıtý jáne jasandy ıntellekt salasyndaǵy yntymaqtastyq jónindegi jahandyq bastamalaryn Qazaqstannyń qoldaýyn erekshe atap ótti.
– Qazaqstan Qytaımen vızasyz rejımge qol qoıǵan Ortalyq Azııadaǵy alǵashqy memleket. Qazaqstan 2025 jyldy Qazaqstandaǵy Qytaı týrızmi jyly dep jarııalady. Qazaqstan Konfýtsıı ınstıtýttarynyń sany boıynsha Ortalyq Azııa aımaǵynda kóshbasshy. Jastardyń qytaı mádenıetine, tiline degen qyzyǵýshylyǵynyń artýy, jastar almasýy, medıa men saraptamalyq ortalyqtar arasyndaǵy yntymaqtastyq bolashaq urpaqqa osy dástúrdi jetkizip, dostyqtyń berik negizin qalyptastyrady, - dep senim bildirdi QQǴA RShEOAI dırektory.
Forým aıasynda saıası senim men dıplomatııalyq qarym-qatynastan bastap tsıfrlyq transformatsııanyń, jasandy ıntellektiniń bolashaǵy men saýda-ınvestıtsııalyq yntymaqtastyqty tereńdetýdiń keleshegine deıingi aýqymdy máselelerdi qamtyǵan úsh taqyryptyq sessııa ótti.
Qazaqstan men Qytaıdyń taldaý ortalyqtarynyń forýmy eki el sarapshylary arasyndaǵy nátıjeli dıalogtyń jalǵasy bola otyryp, seriktestiktiń negizin nyǵaıtýǵa, jahandyq ózgerister jaǵdaıynda ortaq sheshimderdi ázirleýge yqpal etti. Qazaqstan men Qytaıdyń taldaý ortalyqtarynyń alǵashqy forýmy ótken jyldyń qarashasynda Beıjińde ótken bolatyn.
Aıta keteıik, QSZI sarapshylary Almatyda saıası reformalar nátıjelerin talqylady.