Qazaqstan men Qytaı sý tasqynymen kúresý úshin transshekaralyq ózender boıynsha aqparat almasýda
ASTANA. KAZINFORM - Sý resýrstary jáne ırrıgatsııa mınıstrligi sý tasqynymen birlesip kúresý úshin qytaılyq áriptesterimen transshekaralyq ózender boıynsha aqparat almasýda. 2005 jyldan beri Qazaqstan men QHR arasynda transshekaralyq ózenderdegi tabıǵı apattar týraly shuǵyl habarlaý týraly Kelisim bar.

QR Sý resýrstary jáne ırrıgatsııa mınıstrligi baspasóz qyzmetiniń habarlaýynsha, taraptar bir-birine sý tasqyny, muz qozǵalysy men qubylystary týraly aqparat berýge mindetti. Іle ózenindegi «Sandaohetszy», Ertis ózenindegi «Nanvan» jáne Tekes ózenindegi «Tekes» sý beketterinde baqylaý júrgiziledi.
«Mınıstrlik Qytaı, Reseı Federatsııasy jáne Ortalyq Azııa elderiniń sý vedomstvolarymen únemi baılanysta. Barlyq transshekaralyq ózender boıynsha aqparat almasyp otyrmyz. Bul derekter ákimdikterge jáne TJD-ǵa beriledi. Gıdrotehnıkalyq qurylystarda táýlik boıy kezekshilik uıymdastyrylǵan. Tótenshe jaǵdaı týyndaǵan jaǵdaıda «Qazsýshar» jáne basseındik ınspektsııalardyń mamandary qajetti is-sharalardy qabyldaýǵa daıyn», - dedi Sý resýrstary jáne ırrıgatsııa mınıstri Nurjan Nurjigitov.
Eske salsaq, naýryz aıynda Qazaqstan men Qytaıdyń sý vedomstvolary alǵash ret sý resýrstary salasynda ózara túsinistik pen yntymaqtastyq týraly Memorandýmǵa qol qoıdy. Qujat sýdy utymdy jáne turaqty paıdalaný, zamanaýı tehnologııalardy engizý, balamaly sý kózderin bólý jáne ony ıgerý, sondaı-aq tájirıbe almasý jáne birlesip maman daıarlaý baǵyttaryndaǵy ekijaqty yntymaqtastyqty nyǵaıtýdy kózdeıdi.
Osyǵan deıin Qazaqstan men Qytaı alǵash ret sý resýrstary salasynda Memorandýmǵa qol qoıǵany týraly habarlaǵanbyz.