Qazaqstan men Qytaı sý salasynyń mamandaryn daıarlaıtyn kolledj qurmaq
ASTANA. KAZINFORM — Qazaqstan men Qytaı sý sharýashylyǵy salasynyń mamandaryn daıarlaıtyn birlesken kolledj qurýdy pysyqtap jatyr, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
Qazaqstan men QHR elimizdiń sý sharýashylyǵy salasyna jumysshy kadrlar daıarlaıtyn birlesken kolledj qurýǵa baǵyttalǵan is-sharalardy júzege asyrýdy josparlap otyr. Atap aıtqanda, kolledjdi qurýdyń uıymdastyrýshylyq-quqyqtyq modelin ázirleý, sý sharýashylyǵy salasynyń qajettilikterin eskere otyryp, basym baǵyttaǵy mamandyqtar boıynsha bilim berý baǵdarlamalaryn daıyndaý jáne kelisý kózdelgen.
Sondaı-aq sý sharýashylyǵy obektilerinde óndiristik tájirıbeden ótip, dýaldy oqytýdy engizý jáne oqý josparlaryn, zerthanalyq bazany jáne biliktilikti arttyrý baǵdarlamalaryn ázirleýge qytaılyq seriktesterdi tartý kózdeledi.
Budan bólek, bilim alýshylardyń akademııalyq utqyrlyǵyn uıymdastyrý, onyń ishinde qysqamerzimdi taǵylymdamalar men oqý modýlderin ótkizý, sondaı-aq túlekterdiń biliktiligin taný jáne olardy sý sharýashylyǵy salasyndaǵy uıymdarǵa odan ári jumysqa ornalastyrý máselelerin pysyqtaý qarastyrylǵan.
— Bul jobany iske asyrý qytaı tarapynyń qarajaty esebinen júzege asyrylady. Kolledj bilikti jumysshy kadrlar men orta býyn mamandaryn daıarlaýǵa múmkindik beredi. Sonymen qatar qytaılyq seriktestermen birlesip, qazirgi ýaqytta jumys istep júrgen mamandardyń biliktiligin arttyrý jumystary da júrgizilip jatyr. Bıyl Power China kompanııasynyń esebinen Qytaıǵa oqýǵa 200 adam jiberiledi. Byltyr kórshi elde sý sharýashylyǵy salasyndaǵy 125 mamanymyz bilimin jetildirgen bolatyn, — dedi Sý resýrstary jáne ırrıgatsııa mınıstrliginiń Ǵylym jáne ınnovatsııalyq tehnologııalar departamentiniń dırektory Lázzat Júsipova.
Buǵan deıin Qytaıda oqý úshin qazaqstandyq talapkerlerge 73 bilim granty beriletini anyqtaldy.