Qazaqstan men Qytaı sportshylary daıyndyqtyń tehnıkalyq qyr-syryn birlese pysyqtaıdy
ASTANA. KAZINFORM – Týrızm jáne sport mınıstri Erbol Myrzabosynov Shanhaı Yntymaqtastyq Uıymyna (ShYU) múshe memleketterdiń sport mınıstrleri keńesi aıasynda Qytaı Halyq Respýblıkasynyń dene shynyqtyrý jáne sport isteri jónindegi Bas memlekettik basqarmasynyń jetekshisi Gao Chjıdanmen kezdesti.
Erbol Myrzabosynov Qytaıdyń halyqaralyq sport arenasyndaǵy jetistikterin joǵary baǵalap, eki eldiń salalyq vedomstvolary arasyndaǵy áriptestikti tereńdetý sport salasynyń damýyna serpin beretinine senim bildirdi.
Kezdesýde sport salasynda 1998 jyldan qoldanylyp kele jatqan kelisimdi jańartatyn jańa yntymaqtastyq jobasyna erekshe nazar aýdaryldy. Qujatqa 2025 jyldyń sońyna deıin qol qoıý josparlanyp otyr.
— Eń aldymen, Qytaı Halyq Respýblıkasynyń sport salasyndaǵy jetistikterine degen erekshe qurmetimdi bildirgim keledi. Qytaı — sportshylar daıyndaý, sport ǵylymyna ınnovatsııalyq tásilderdi engizý jáne salamatty ómir saltyn nasıhattaý boıynsha álemde kóshbasshy elderdiń biri. Elderimiz arasyndaǵy ekijaqty yntymaqtastyqty nyǵaıtý sport salasynyń damýyna tyń serpin beretinine senimdimin, — dep atap ótti Erbol Myrzabosynov.
Taraptar birlesken oqý-jattyǵý jıyndary men sportshylar arasynda tájirıbe almasýǵa qyzyǵýshylyq bildirdi.
— Biz Qazaqstannyń sporttaǵy jetistikterin, ásirese aýyr atletıka, dzıýdo, boks jáne kúres túrlerindegi nátıjelerin zor yqylaspen baqylap otyramyz. Qazaqstandyq sportshylardyń deńgeıi, tehnıkasy men jarysqa daıyndyǵy qarqyndy ósip kele jatqany baıqalady. Qazaqstan halyqaralyq arenada óz ornyn aıqyndap, birqatar olımpıadalyq sport túrlerinde kóshbasshy elge aınalyp keledi. Biz ekijaqty áriptestikti keńeıtýge shyn júrekten múddelimiz, sportshylarymyzdyń kásibı ósýine jaǵdaı jasaý maqsatynda birlese jumys isteýge daıynbyz, — dedi Gao Chjıdan.
Kezdesý sońynda Erbol Myrzabosynov Qytaı sportshylaryn Almatydaǵy «Almaty» olımpıadaǵa daıyndyq ortalyǵynda ótetin oqý-jattyǵý jıyndaryna qatysýǵa shaqyrdy. Osy arqyly eki eldiń sportshylary tájirıbe almasyp, daıyndyqtyń taktıkalyq ári tehnıkalyq qyr-syryn birlese pysyqtaıdy.
Aıta ketelik qazaqstandyq tennısshi, álemniń 191-raketkasy Tımofeı Skatov Rolan Garros týrnıriniń irikteý saıysynda alǵashqy jeńisine qol jetkizgen edi.