Qazaqstan men Qytaı ShYU aıasynda tyǵyz jumys isteýge beıil — Memleket basshysy
ASTANA. KAZINFORM — ShYU aıasyndaǵy yntymaqtastyq Qazaqstannyń aımaqtyq ustanymymen úndesip otyr. Qazaqstan Prezıdenti Qasym-Jomart Toqaev qytaılyq China Daily basylymynda jarııalanǵan «Qazaqstan men Qytaıdyń berik ári senimdi qarym-qatynasy — tabysty yntymaqtastyqtyń kepili» atty maqalasynda osylaı dedi.
Prezıdenttiń sózinshe, dıplomatııalyq turǵydan Qazaqstan men Qytaı Shanhaı yntymaqtastyq uıymynyń aıasynda tyǵyz jumys isteýge beıil.
— ShYU turaqtylyqqa, ekonomıkalyq damýǵa jáne mádenı almasýǵa dáneker bolyp, Eýrazııadaǵy kópjaqty yntymaqtastyqtyń negizgi alańyna aınaldy. Uıymnyń negizin qalaýshy elder retinde Qazaqstan men Qytaı óńirdi jan-jaqty damytý isine ShYU áleýetin tolyq paıdalaný úshin birge jumys istep jatyr. Qytaıdyń qazirgi tóraǵalyǵy aıasynda ShYU óńirlik qaýipsizdikti nyǵaıtýǵa, ekonomıkalyq ıntegratsııany tereńdetýge jáne mádenı-gýmanıtarlyq baılanystardy kúsheıtýge erekshe mán berip otyr. Atalǵan basymdyqtar Qazaqstannyń óz aımaǵymyzǵa qatysty ustanymymen barynsha úndesedi, — dedi Toqaev.
Memleket basshysy atap ótkendeı, Tıantszın qalasynda ótetin ShYU-nyń tarıhı sammıti uıymnyń aldaǵy damý traektorııasyn aıqyndaıdy.
— Basqosý ózekti jahandyq máseleler boıynsha strategııamyzdy úılestirip, ınstıtýttyq reformalardy ilgeriletýge aıryqsha múmkindik beredi. Sammıt qazirgi almaǵaıyp zamanda ShYU-nyń álemdegi turaqtylyqty saqtaýǵa eleýli úles qosatyn birlestik retindegi rólin nyǵaıta túserine senimdimin. Qazirgi jaǵdaıda Shanhaı yntymaqtastyq uıymynyń ózara qurmetke jáne birge damýǵa negizdelgen ustanymynyń ózektiligi burynǵydan beter arta tústi, — dep túıindedi Prezıdent.
Buǵan deıin habarlanǵandaı, Memleket basshysy Qasym-Jomart Toqaev qazaqstandyqtardy Konstıtýtsııa kúnimen quttyqtady.