Aqyldy keden: Júk kólikteri Qazaqstan men Qytaı shekarasynan júrgizýshisiz ótedi
ASTANA. KAZINFORM — Qazaqstan men Qytaı «Aqyldy keden» atty ınnovatsııalyq pılottyq jobany qazaqstan-qytaı shekarasynda júzege asyrýǵa kiristi. Bul týraly Memlekettik kirister komıteti málim etti.
Bastama sheńberinde «Baqty» (QR) — «Pokıtý» (QHR) shekaralyq ótkizý pýnkteri arqyly júrgizýshisiz júk tasymalyn iske qosý josparlanǵan.
Joba Qazaqstan Respýblıkasy Qarjy mınıstrliginiń Memlekettik kirister komıtetiniń tóraǵasy Jandos Dúısembıev pen Tachen qalasy partııa komıtetiniń hatshysy Chjı Sıanveıdiń myrzamen jumys kezdesýinde kelisildi.
Jobanyń negizgi erekshelikteri:
- júrgizýshiniń qatysýynsyz shekarany avtomatty túrde kesip ótý úshin júrgizýshisiz kólik quraldaryn (AGV) paıdalaný;
- eki el de moıyndaıtyn biryńǵaı elektrondyq deklaratsııany iske qosý;
- qolmen jasaýdy barynsha azaıta otyryp táýlik boıy júk qozǵalysyn qamtamasyz etý;
- júk tasymalyn tolyq tsıfrlyq súıemeldeý jáne resimdeý;
- avtomattandyrylǵan navıgatsııa men baqylaýdy engizý.
Kútiletin nátıje:
júk aǵynyn jylyna 10 mıllıon tonnaǵa deıin ulǵaıtý;
kedendik resimdeý ýaqytyn edáýir qysqartý;
kólik shyǵyndaryn azaıtý;
logıstıkalyq operatsııalardyń ashyqtyǵy men qaýipsizdigin arttyrý;
avtokólik ınfraqurylymynyń júktemesin azaıtý jáne logıstıkalyq habtardy damytý;
aýyl sharýashylyǵy ónimderiniń, sonyń ishinde astyq, maıly daqyldar, et jáne qaıta óńdelgen ónimderdiń eksportyn yntalandyrý.
Jobanyń ekonomıkalyq mańyzy
— Bul bastama shekara mańy ınfraqurylymyn jańǵyrtýǵa, jańa jumys oryndaryn qurýǵa jáne ınvestıtsııa tartýǵa serpin beredi. Jobany iske asyrý Qytaımen saýda-ekonomıkalyq yntymaqtastyqty nyǵaıtyp, Qazaqstannyń Ortalyq Azııadaǵy negizgi tranzıttik torap retindegi pozıtsııasyn kúsheıtedi, — delingen habarlamada.
Sapar sheńberinde jobany birlesip iske asyrýǵa, is-qımyldardy úılestirýge jáne kedendik ári logıstıkalyq rásimderdi tsıfrlandyrý salasynda tájirıbe almasýǵa baǵyttalǵan ekijaqty yntymaqtastyq týraly memorandýmǵa qol qoıyldy.
Eske sala keteıik, buǵan deıin Qorǵas keden beketi arqyly júk aınalymy alty aıda 20 mln tonnadan asqanyn jazǵan bolatynbyz.