Qazaqstan men Qytaı shekaradaǵy ótkizý qabiletin arttyrady
ASTANA. KAZINFORM – 2025 jylǵy 23 mamyrda «Nur Joly» – «Qorǵas» ótkizý pýnktterinde Qazaqstan men Qytaı delegatsııalarynyń birlesken jumys sapary ótti. Bul týraly Memlekettik kirister komıteti habarlady.
Qazaqstandyq delegatsııany Qarjy mınıstrligi Memlekettik kirister komıtetiniń tóraǵasy Jandos Dúısembıev, qytaılyq delegatsııany QHR bas keden basqarmasynyń mınıstri Sýn Meıtszıýn basqardy. Bul sapar Memleket basshysynyń tapsyrmalaryn iske asyrý jáne Qytaı baǵyty boıynsha úlken kezekterdi sheshý qajettiligi aıasynda uıymdastyryldy. Ortaq ınspektsııa júrgizý týraly kelisim 2025 jylǵy 21–22 mamyrda Ortalyq Azııa jáne Qytaı keden qyzmetteri basshylarynyń kezdesýinde jasaldy.
Sapar barysynda delegatsııa basshylary eki eldiń ótkizý pýnktteri – «Nur Joly» jáne «Qorǵas» – ornalasqan ınfraqurylymmen tanysyp, shekaranyń eki jaǵyndaǵy nysandardy aralady.
Inspektsııa qorytyndysy boıynsha kelesi naqty sheshimder qabyldanyp, ýaǵdalastyq jasaldy:
«Nur Joly» – «Qorǵas» ótkizý pýnktteriniń táýlik boıy jumys isteý rejımin 2026 jylǵy 30 maýsymǵa deıin uzartý;
Qytaı tarapynyń Qazaqstannan keletin avtokólik quraldaryn qabyldaý kólemin ulǵaıtý:
«Nur Joly» ótkizý pýnkti arqyly – qazirgi tańda táýligine 650 ATS qabyldanýda, 1 shildeden bastap bul kórsetkish 750 ATS bolady, al qyrkúıek aıynda – 1000 ATS deıin arttyrylady;
«Qaljat» ótkizý pýnkti arqyly – táýligine 130 ATS-ten 250 ATS-ke deıin artty, maýsym aıynda 300 ATS-ke deıin ulǵaıtylady;
2025 jylǵy mamyr aıynyń sońyna deıin Qytaı tarapynyń «Dýlaty» ótkizý pýnktinde qosymsha mobıldi ınspektsııalyq-baıqaý keshenin (MIDK) iske qosý;
2025 jylǵy qyrkúıektiń sońyna deıin «Qorǵas» ótkizý pýnktinde turaqty ınspektsııalyq-baıqaý keshenin ornatý;
Inspektsııalyq-baıqaý keshenderiniń rentgendik keskinderin ózara taný jóninde kelisimge qol jetkizildi, bul qaıtalap tekserý ýaqytyn qysqartyp, shekaradan ótý úderisin jedeldetedi;
«Qorǵas» HShSO arqyly tasymal aǵyndaryn ońtaıly bólý josparlanýda, bul «Nur Joly» ótkizý pýnktindegi júktemeni azaıtýǵa jáne tasymal qozǵalysyn teńgerimdi bólýge múmkindik beredi;
«Nur Joly» – «Qorǵas» ótkizý pýnktterinde qozǵalys jolaqtary men shekaralyq kópirdi keńeıtý máselesi eki tarappen birlesip qaralýda;
Shekara mańyndaǵy keden qyzmetteri deńgeıinde aı saıynǵy otyrystar jáne Qazaqstan-Qytaı keden organdarynyń úılestirýshileriniń toqsan saıynǵy kezdesýlerin ótkizý kelisildi.
Sapar qorytyndysynda delegatsııa basshylary qol jetkizilgen ýaǵdalastyqtardyń mańyzdylyǵyn atap ótip, birlesken jumysty jalǵastyrýǵa daıyn ekendikterin rastady. Mınıstr Sýn Meıtszıýn sondaı-aq «Nur Joly» ótkizý pýnktiniń ınfraqurylymdyq múmkindikteri men Qazaqstannyń elektrondyq kezek júıesin joǵary baǵalap, onyń tasymal úderisiniń yńǵaılylyǵy men tıimdiligin arttyrýdaǵy rólin atap ótti.
Aıta ketý kerek, Qazaqstan men Qytaı únemi ózara is-qımyl júrgizip keledi. Birlesken sharalardyń nátıjesinde Qytaımen shekaradaǵy ótkizý qabileti 2023 jyly 202 myńnan 429 myń ATS-ke deıin (112%), 2024 jyly 429 myńnan 734 myń ATS-ke deıin (71%) artty. 2025 jyldyń alǵashqy 4 aıynda 238,5 myń ATS qozǵalysy tirkelip, 41%-ǵa ósim kórsetildi.
Joǵaryda kórsetilgen barlyq shara eki el arasyndaǵy taýar aınalymyn jáne tranzıttik áleýetti odan ári ulǵaıtýǵa, sondaı-aq eki baǵyt boıynsha kezekterdi edáýir qysqartýǵa múmkindik beredi.
Aıta ketelik Qorǵas keden beketi avtokólik eksportynan rekordtyq kórsetkishke qol jetkizgeni týraly jazǵan edik.