Qazaqstan men Qytaı shekara mańyndaǵy ken oryndaryn birlesip ıgerýi múmkin
ASTANA. KAZINFORM — Qazaqstan Ulttyq taý-ken ǵylymdary akademııasynyń prezıdenti Nurlan Ryspanov Qazaqstan-Qytaı tústi metallýrgııany ornyqty damytý forýmynda Qytaımen taý-ken jáne metallýrgııa salasyndaǵy yntymaqtastyqty keńeıtý úshin birqatar usynys aıtty.
Nurlan Ryspanov Qytaı tústi metallýrgııa ónerkásibi qaýymdastyǵy, Qazaqstan Ulttyq taý-ken ǵylymdary akademııasy jáne Qazaqstannyń Taý-ken ónerkásibi odaǵy arasynda memorandým jasaýdy usyndy.
Onyń aıtýynsha, qujat aıasynda Qazaqstannyń ońtústik-shyǵysy men Qytaıdyń shekaralas óńirlerindegi paıdaly qazbalardy ıgerý baǵdarlamasyn ázirleýge bolady.
— Kóp ken orny shekaranyń eki jaǵynda ornalasqan. Sonymen qatar Qytaı Halyq Respýblıkasy jaǵyndaǵy kóptegen ken oryndary ıgerilip jatyr, al Qazaqstan jaǵyndaǵylary rezervte tur. Birlesken kásiporyn úshin bir ınfraqurylym qurýǵa bolady. Bul bolashaq kásiporynnyń shyǵyndaryn aıtarlyqtaı qysqartýǵa múmkindik beredi, — dedi vedomstvo prezıdenti.
Ol sondaı-aq eki tarapqa qyzyǵýshylyq týdyratyn birqatar ken oryndary boıynsha tehnıkalyq-ekonomıkalyq negizdemeler ázirleýdi usyndy.
— Ken ornyn ıgerý jobasynyń birinshi bóligi retinde eki taraptyń bıznesi úshin qyzyǵýshylyq týdyratyn birqatar ken oryndary boıynsha tehnıkalyq-ekonomıkalyq baıandamalar ázirleý qajet, — dedi akademııa basshysy.
Sonymen qatar Nurlan Ryspanov Qytaı tústi metallýrgııa ónerkásibi qaýymdastyǵy men Dúnıejúzilik taý-ken ǵylymdary akademııasy birlesip Qytaı Ulttyq taý-ken ǵylymdary akademııasyn qurý boıynsha jumys júrgizýi qajet ekenin atap ótti. Bul qytaılyq jáne qazaqstandyq taý-ken ǵalymdaryn osy máselege tartýǵa múmkindik beredi dep túıindedi.
Buǵan deıin Qazaqstan men Qytaı tústi metallýrgııany turaqty damytý jáne «jasyl» paıdaly qazbalar salasyndaǵy yntymaqtastyqty keńeıtýdi jalǵastyratynyn jazǵanbyz.
