Qazaqstan men Qytaı shekara beketteriniń arasynda eki shaqyrym emes eki ǵasyr alshaqtyq bar — Qazybek Isa

ASTANA. KAZINFORM — Májilis depýtaty Baqty kedeniniń bir jyldyq ótkizý qabyleti 21 900 kólikten aspaıdy. Jańa ınfraqurylym salynǵannan keıin bul kórsetkish 182 500 kólikke jetý kerek ekenin aıtty. 

— Shekaranyń ar jaǵynda Qytaıdyń jaı aýylynyń ózinde kókpen talasqan záýlim ǵımarattar Qazaqstan jaqtaǵy qurylysy bitpeı, shańy shyǵyp jatqan kedeı keden men jalǵyz býdkaǵa shekesinen qarap, qasqaıyp tur. Biz jaqta kózge iliner bir ǵımarat joq. Qazaq Eli men Qytaıdyń shekara beketteriniń arasynda eki shaqyrym emes eki ǵasyr jatyr, — dedi Qazybek Isa.

Onyń málimetinshe, Baqty kedeniniń bir jyldyq ótkizý qabyleti 21 900 kólikten aspaıdy. Jańa ınfraqurylym salynǵannan keıin bul kórsetkish 182 500 kólikke jetý kerek. Qurylystyń keshigýi saldarynan bir jyldyń ózinde 160 600 kólik shekaradan ótpeı, qazynaǵa birneshe mıllıard teńge túspeı qalǵan.

— Tranzıttik kólikterdiń 90 paıyzy Reseı men Belarýs kompanııalaryna, olardyń Qazaqstanda tirkelgen fırmalaryna tıesili. Qazaqstandyq kólikterdiń ózinde júrgizýshiler — shetel azamattary. Sonda 16 mlrd teńge shyǵyndalǵan keden qurylysy qyzyǵyn ózimiz emes, sheteldikter kórsin dep salyp jatyrmyz ba, — dep surady depýtat.

Sondaı-aq, ol Batys Qazaqstannyń Qaztalov aýdanyndaǵy Reseımen aradaǵy 81 shaqyrym shekara durys qorshalmaǵandyqtan bir qysta 1,5 myń mal shekaradan ótip ketken.

— Shyǵys Qazaqstannyń Qaton-Qaraǵaı aýdanynda da qanshama qorshaýsyz shekaradan qanshama mal kórshi elge ótip ketip, qaıtpaı jatyr?!

Malynan aıryla bergen soń malshylar «shekarany ózimiz salyp alamyz» dep júrse, sonda «shekarany shegendep tas qylyp tastadyq» degenimiz qaıda, — dedi Qazybek Isa.

Buǵan deıin qyrkúıek aıynda Qazaqstan shekarasynda zańsyz taýar ótkizýge qatysty 1 300-den astam fakti áshkerelengenin jazǵan edik.