Qazaqstan men Qytaı premıým týrıstik marshrýttar jasamaq
ASTANA. KAZINFORM — 17 qyrkúıekte Tachen qalasyndaǵy (Shyńjań) «Ortalyq Azııa» mádenı almasý ortalyǵynda «Baketý — Tachen» forýmy ashyldy.
Tachenge Qazaqstan, Reseı jáne basqa da elderden úkimet pen bıznes ókilderi, ǵalymdar men sarapshylar jınaldy. Olar transshekaralyq yntymaqtastyq pen batysqa ashyqtyqtyń jańa arhıtektýrasyn talqylap jatyr.
Qazaqstannyń Qytaıdaǵy Elshiliginiń keńesshisi Bolat Úsenov bıylǵy jyl Qazaqstan men Qytaı arasyndaǵy mádenı almasý jyly ekenin atap ótti. Onyń aıtýynsha, vızasyz rejım engizilgennen keıin eki el arasyndaǵy týrıstik baılanys aıtarlyqtaı jandana túsken.
— Byltyr Qazaqstanǵa 1 mıllıonnan astam qytaılyq týrıst keldi. Endi Tachenmen birlesip, premıým klastaǵy transshekaralyq týrıstik marshrýttar jasaǵymyz keledi. Sonymen qatar týrıstik ınfraqurylymdy damytyp, óner men sport salalarynda jastar almasýyn jandandyrýdy josparlap otyrmyz, — dedi Bolat Úsenov.
Aıta keteıik, Qytaıdan Almatyǵa týrıstik poıyz turaqty qatynaı bastady.
