Qazaqstan men Qytaı ózara taýar aınalymyn 2 esege arttyrady
ASTANA. KAZINFORM – Qazaqstan men Qytaı ózara taýar aınalymyn 2 esege arttyrady. Bul týraly Memleket basshysy Qasym-Jomart Toqaevpen kelissózderden keıingi baspasózge arnalǵan málimdeme barysynda Qytaı Halyq Respýblıkasynyń Tóraǵasy Sı Tszınpın aıtty.
«Bir beldeý jáne bir jol» bastamasy aıasynda joǵary sapaly yntymaqtastyqty júzege asyryp, praktıkalyq salalardaǵy yntymaqtastyq boıynsha jańa nátıjelerge qol jetkizýge yqpal etetin bolamyz. Qysqa merzimde taýar aınalymyn eki esege arttyrý úshin jańa mindet qoıyldy. Saýda jáne ekonomıka, ınvestıtsııalar, ındýstrııalandyrý, kóliktik ózara baılanys jáne energetıka sııaqty dástúrli sektorlardaǵy yntymaqtastyqty úzdiksiz tereńdetýge kelistik», - dedi Qytaı basshysy.
Sonymen qatar Sı Tszınpınniń aıtýynsha, eki el arasyndaǵy saýda-ekonomıkalyq yntymaqtastyq baǵdarlamasyn iske asyrý jónindegi jol kartasy muqııat iske asyrylady. Indýstrııalandyrý salasyndaǵy yntymaqtastyq jobalar tabysty ilgeriletiledi. Transkaspıı halyqaralyq kólik baǵyty men elderimiz arasyndaǵy úshinshi transshekaralyq temir jol qurylysy jedeldetiledi.
«Negizgi mıneraldyq resýrstar, balamaly energııa kózderi, ǵylymı jáne tehnıkalyq ınnovatsııalar, avıatsııa jáne ǵarysh, tsıfrlyq ekonomıka salalarynda jańa ósý núktelerin birlesip damytýǵa nıettimiz», - dedi ol.
