Qazaqstan men Qytaı otandyq sý salasy mamandaryn daıarlaýda áriptestikti nyǵaıtpaqshy

ASTANA. KAZINFORM — Sý resýrstary jáne ırrıgatsııa mınıstrligi Qytaıdaǵy áriptesterimen kadrlardy birlesip daıarlaýdy jalǵastyrý týraly kelissózder júrgizip jatyr.

Bıyl mamyr aıynyń sońynda sý mınıstrliginiń basshysy Nurjan Nurjigitov Power China bas dırektory Van Bınmen kezdeskenin eske sala keteıik. Qazaqstan tarapy aldaǵy birneshe jyl ishinde sý sharýashylyǵy salasyndaǵy otandyq mamandardyń biliktiligin arttyrýǵa múmkindik beretin orta merzimdi oqý josparyn ázirleýdi usyndy.

Búginde Qytaıda qazaqstandyq 60 maman biliktiligin arttyrdy. Jyl sońyna deıin taǵy 60 maman Qytaıda oqýdan ótpek. Bul kýrstar Qytaı tarapynyń qarjysy esebinen uıymdastyrylyp otyr.

Eske sala ketsek, bıyl naýryz aıynda Qazaqstan men Qytaıdyń sý vedomstvolary alǵash ret ózara túsinistik pen yntymaqtastyq týraly Memorandýmǵa qol qoıǵan bolatyn. Qujat sý resýrstaryn tıimdi ári turaqty paıdalaný, zamanaýı tehnologııalardy engizý, balamaly sý kózderin bólý men ıgerý, tájirıbe almasý jáne birlesip mamandar daıarlaý sııaqty baǵyttarda ekijaqty yntymaqtastyqty nyǵaıtýdy kózdeıdi.

– Biz taǵylymdamalar men bilim berý baǵdarlamalaryn birlesip ázirleý, sondaı-aq bilim, tájirıbe jáne tehnologııalarmen almasý bastamalaryn talqylaýǵa daıynbyz. Eki el arasyndaǵy tyǵyz yntymaqtastyq Qazaqstannyń sý salasyndaǵy kadrlyq áleýetin damytýǵa septigin tıgizedi dep senemin. Sonymen qatar bul strategııalyq áriptestigimizdi de nyǵaıta túsedi, – dedi Sý resýrstary jáne ırrıgatsııa mınıstri Nurjan Nurjigitov.

Buǵan deıin habarlanǵandaı, sý salasy qyzmetkerleriniń jalaqysy 50%-ǵa deıin ósedi.