Qazaqstan men Qytaı munaı ónimderin óndiretin klaster qurmaq
ShYMKENT. KAZINFORM - 2024 jylǵy 23 mamyrda Energetıka mınıstrligi, «QazMunaıGaz» UK AQ, «PetroQazaqstan Oıl Prodakts» JShS (PKOP) jáne CNPC ókilderiniń qatysýymen «Shymkent munaı óńdeý zaýytynyń qýatyn jylyna 12 mln tonnaǵa deıin arttyrý» jobasynyń mártebesi men josparlanǵan jumystary boıynsha jumys keńesi ótti.
PKOP zaýyty-óndiristik qýaty jylyna 6 mln tonna bolatyn Ortalyq Azııadaǵy iri munaı óńdeý zaýyttarynyń biri. Ol eń aldymen, elimizdiń motor otynyna degen qajettiligin qamtamasyz etedi.
Mınıstrlik múddeli memlekettik organdarmen birlesip memlekettik qoldaý sharalaryn, onyń ishinde shıkizatpen, ınfraqurylymmen jáne energoresýrstarmen qamtamasyz etý, halyqaralyq standarttardy qoldaný máselelerin qarady. Sondaı-aq áleýetti ınvestorlardyń qarsy mindettemelerin aıqyndaıtyn QR jáne QHR úkimetaralyq kelisiminiń jobasyn ázirledi.
Joba memleket basshysynyń joldaýy sheńberinde joǵary deńgeıdegi óńdelgen ónim shyǵaratyn klaster qurýǵa kózdelgen basym baǵyttardaǵy 15 iri jobanyń tizimine kiredi.
Aldyn ala esepteýler boıynsha jobany iske asyrý avtobenzın óndirisin 700 myń tonnaǵa, avıaotyn óndirisin 700 myń tonnaǵa, dızel otynyn óndirýdi 3,9 mln tonnaǵa deıin ulǵaıtýǵa múmkindik beredi.
Jańa nysandardy iske qosý 2030 jylǵa josparlanǵan.
