Qazaqstan men Qytaı medıtsınalyq-sanıtarııalyq alǵashqy kómek salasynda yntymaqtastyqty keńeıtýde
ALMATY. KAZINFORM — Almatyda Dúnıejúzilik densaýlyq saqtaý uıymynyń (DDU) qoldaýymen uıymdastyrylǵan Qytaı Halyq Respýblıkasynyń qatysýshylarymen medıtsınalyq-sanıtarııalyq alǵashqy kómek máseleleri boıynsha elaralyq dıalog jumys isteı bastady.
Іs-sharaǵa QR Densaýlyq saqtaý mınıstri Aqmaral Álnazarova, DDU-nyń MSAK jónindegi eýropalyq ortalyǵynyń basshysy Melıtta ıAkab, DDU-nyń Eýropalyq óńirlik bıýrosynyń dırektory Hans Klıýge, QHR Ulttyq densaýlyq saqtaý komıssııasynyń MSAK jónindegi departamenti bas dırektorynyń orynbasary Chen Kaı qatysty.
Qatysýshylar MSAK-ty damytýdyń negizgi máselelerin, tájirıbe almasýdy jáne eki eldegi medıtsınalyq qyzmetterdi jaqsartýǵa baǵyttalǵan ınnovatsııalyq sheshimderdi talqylady.
Aqmaral Álnazarova óziniń kirispe sózinde jaqynda bolǵan sapar barysynda tanysqan Qytaıdaǵy medıtsınalyq tehnologııalardyń joǵary deńgeıin atap ótti jáne elderdiń arasyndaǵy tájirıbe almasý birlesken damý úshin jańa perspektıvalar ashatynyna senim bildirdi.
«Biz QHR ókilderin qazirdiń ózinde densaýlyq saqtaýdaǵy úzdik tájirıbeler almasý úshin biregeı alańǵa aınalǵan DDU-nyń MSAK boıynsha demonstratsııalyq platformasynyń bazasynda qabyldaǵanymyzǵa qýanyshtymyz. Bizdiń yntymaqtastyǵymyz eki eldiń medıtsınalyq júıesin nyǵaıtyp qana qoımaı, azamattarymyzdyń ál-aýqatyn arttyrýdaǵy mańyzdy qadam bolatynyna senimdimin», - dep atap ótti Álnazarova.
Sondaı-aq, Mınıstr Qytaı tarapyna 2023 jyly Memleket basshysy aıtqan jáne DDU bas dırektory men DDU-ǵa qatysýshy kóptegen elderdiń maquldaýyna ıe bolǵan MSAK boıynsha elder koalıtsııasyn qurý jónindegi Qazaqstannyń bastamasyn qoldaýdy usyndy. Dıalogtyń barysynda halyqaralyq ózara is-qımyldy kúsheıtý jáne búkil óńir boıynsha MSAK-tyń tıimdi praktıkalaryn taratý talqylandy.
QHR delegatsııasynyń Almaty men Esik qalalaryndaǵy MSAK mekemelerine saparlary, sondaı-aq psıhıkalyq densaýlyqty saqtaý jáne densaýlyq saqtaýdy tsıfrlandyrý sııaqty reformalardyń negizgi baǵyttaryn talqylaý medıtsına salasyndaǵy eki el arasyndaǵy áriptestik qatynastardy odan ári nyǵaıtý úshin negiz bolady.
