Qazaqstan men Qytaı medıasy arasynda mádenı yntymaqtastyq pysyqtaldy
ASTANA. KAZINFORM — Memlekettik keńesshi Erlan Qarın Qytaı Halyq Respýblıkasyna jumys sapary aıasynda China Media Group bas dırektory, Qytaı Kommýnıstik partııasy Ortalyq komıtetiniń Nasıhat bólimi meńgerýshisiniń orynbasary Shen Haısıýnmen kezdesti. Bul týraly Aqorda málim etti.
Sondaı-aq basqosýǵa Qazaqstan Respýblıkasynyń Qytaı Halyq Respýblıkasyndaǵy Tótenshe jáne ókiletti elshisi Shahrat Nuryshev, Qazaqstan Respýblıkasy Prezıdenti teleradıokesheniniń dırektory Raýshan Qajybaeva jáne «Jibek joly» telearnasynyń dırektory Erkejan Kúntýǵan qatysty.
Erlan Qarın Prezıdent Qasym-Jomart Toqaevtyń basshylyǵymen elimizde júzege asyp jatqan mádenı-gýmanıtarlyq reformalardyń mán-mazmuny, sondaı-aq tsıfrlandyrýdy keńinen damytý jáne jasandy ıntellektini jappaı engizý baǵytyndaǵy jumystar týraly aıtty.
Taraptar byltyr Qazaqstanda ótken Silk Way Star halyqaralyq baıqaýynyń joǵary deńgeıde uıymdastyrylǵanyn atap ótip, bıyl Qytaıda jalǵasyn tabatyn konkýrsqa daıyndyq máselesin pysyqtady.
Jobanyń birinshi maýsymynyń translıatsııasy tek Qytaıdyń ózinde 1 mıllıardtan astam qaralym jınady. Bıyl baıqaýda Qazaqstan atynan qytaılyq kórermenge jaqsy tanys ánshi Rýhııa Baıdúkenova óner kórsetedi.
— Jobanyń ekinshi maýsymynyń túsirilimi 2026 jyldyń shilde aıynda Qytaıdyń Iý qalasynda ótedi dep kútilip otyr. Josparlanǵan 10 shyǵarylymnyń kórsetilimi shilde aıynyń sońynan qyrkúıek aıynyń sońyna deıin kópshilikke usynylmaq. Aıryqsha atap óterlik jaıt, Silk Way Star — mundaı formatta uıymdastyrylǵan Azııadaǵy alǵashqy halyqaralyq vokaldyq baıqaý. Ári qazaqstandyq medıa joba tuńǵysh ret Qytaıdyń ortalyq telearnasynda júzege asyrylmaq, — delingen habarlamada.
Shen Haısıýn mundaı jobalar China Media Group pen Qazaqstan Respýblıkasy Prezıdentiniń teleradıokesheni arasyndaǵy jemisti yntymaqtastyqtyń nátıjesi sanalatynyn atap ótti.
Keıingi eki jylda Prezıdent teleradıokesheni men China Media Group birqatar birlesken jobany júzege asyrdy. Olardyń qatarynda «Astana-Beıjiń» telekópiri, Shanhaı yntymaqtastyq uıymynyń sammıti aıasyndaǵy telekonferentsııa, sondaı-aq arnaıy shyǵarylymdar men derekti fılmder bar.
Sonymen qatar Memlekettik keńesshi 2026 jylǵy 1-3 qazanda Astanada jasandy ıntellekt tehnologııalaryn qoldaný arqyly túsirilgen fılmderdiń alǵashqy halyqaralyq festıvali — «Astana AI Film Festival» (AAIFF 2026) ótetinin jetkizdi. Jasandy ıntellekt kómegimen túsirilgen qysqametrajdy fılmderdiń halyqaralyq baıqaýy atalǵan festıvaldiń basty ýaqıǵasy bolmaq.
Kezdesý barysynda taraptar mádenı-gýmanıtarlyq saladaǵy ózekti máselelerdi keńinen talqylap, ózara túsinistik pen yntymaqtastyq rýhyndaǵy dıalogty odan ári jalǵastyrýǵa ýaǵdalasty.
Eske sala keteıik, buǵan deıin BBC qazaqstandyq Silk Way Star jobasyn gýmanıtarlyq dıalog úlgisi dep jazǵan bolatyn.
