Qazaqstan men Qytaı mashına jasaý jáne joǵary tehnologııalar salasyndaǵy seriktestikti kúsheıtpek
ASTANA. KAZINFORM — Premer-mınıstrdiń birinshi orynbasary Roman Sklıar Qytaıǵa jumys sapary barysynda Hanchjoý qalasynda Chjetszıan provıntsııasy partııa komıtetiniń hatshysy Van Hao myrzamen, sondaı-aq Qytaıdyń jetekshi ónerkásiptik kompanııalarynyń basshylarymen kezdesýler ótkizdi. Bul týraly Úkimettiń baspasóz qyzmeti habarlady.
Kezdesý barysynda taraptar ekijaqty strategııalyq áriptestiktiń basym baǵyttary boıynsha jan-jaqty pikir almasyp, ınvestıtsııalyq, ónerkásiptik ózara is-qımyldy odan ári tereńdetý perspektıvalaryn qarastyrdy, sondaı-aq Qazaqstan men Chjetszıan provıntsııasy arasynda mashına jasaý, avtomobıl jasaý, jańa jáne joǵary tehnologııalar sııaqty salalardaǵy yntymaqtastyqty nyǵaıtý, onyń ishinde óńiraralyq deńgeıde praktıkalyq ózara is-qımyldy jandandyrý jónindegi ýaǵdalastyqtarǵa qol jetkizdi.
Sondaı-aq Qazaqstan-Qytaı ónerkásiptik yntymaqtastyǵynyń ornyqty serpini jáne iri ındýstrııalyq jobalardy júzege asyrýdaǵy qytaı kompanııalarynyń aıtarlyqtaı praktıkalyq tájirıbesi týraly aıtyldy. Ózara is-qımyl Qazaqstan men Qytaı arasyndaǵy strategııalyq áriptestik sheńberinde damıdy jáne ekonomıkanyń serpindi salalaryn uzaqmerzimdi tehnologııalyq damytýǵa baǵdarlanady.
Kezdesý qorytyndysy boıynsha qytaılyq kompanııalardyń ókilderi qol jetkizilgen ýaǵdalastyqtardy dáıekti júzege asyrýǵa, óndiristik jáne tehnologııalyq yntymaqtastyqty keńeıtýge, sondaı-aq Qazaqstan aýmaǵynda zamanaýı ınjenerlik sheshimderdi lokalızatsııalaý men engizýdi tereńdetýge daıyndyǵyn rastady.
Roman Sklıar Qazaqstan Úkimetiniń birlesken bastamalardy kidirissiz qoldaýǵa jáne damytýǵa, sondaı-aq olardy júzege asyrýdy úılestirýge jáne barlyq kezeńde jobalardy tabysty oryndaý úshin jaǵdaı jasaýǵa daıyn ekendigin atap ótti. Qazaqstan-Qytaı strategııalyq áriptestigi sheńberinde metallýrgııa, taý-ken baıytý ónerkásibi jáne avtomobıl óndirisi salasyndaǵy basym jobalardy syndarly ózara is-qımyldy jalǵastyrý jáne praktıkalyq pysyqtaý týraly ýaǵdalastyqqa qol jetkizildi.
Aıta ketelik ındýstrııalyq aımaqtarda 200-den astam jańa joba iske asyrylatyny týraly jazǵan edik.