Beıjińde Qazaqstan men Qytaıdyń ózara mádenıet jylynyń ashylý saltanaty ótti
ASTANA. KAZINFORM — Beıjińdegi Qytaı ulttyq opera teatrynda Qazaqstan-Qytaı mádenı aralyq jylynyń ashylý saltanaty ótti. Merekelik kesh eki eldiń jetekshi ónerpazdarynyń basyn qosty, dep habarlaıdy Kazinform agenttiginiń Beıjińdegi menshikti tilshisi.
Qatysýshylar men qonaqtar aldynda Qazaqstan Respýblıkasy Premer-mınıstriniń orynbasary — Mádenıet jáne aqparat mınıstri Aıda Balaeva men Qytaı Halyq Respýblıkasynyń Týrızm jáne mádenıet mınıstri Sýn Elı quttyqtaý sóz sóıledi.
Keshtiń mádenı baǵdarlamasynda biregeı qoıylymdar usynyldy. Eki eldiń ataqty ansamblderi — Abylaı Tilepbergen jetekshilik etetin Qurmanǵazy atyndaǵy Qazaq ulttyq halyq aspaptar orkestri jáne maestro Tszın Hýan jetekshilik etetin Qytaı opera jáne baletiniń halyq orkestri ózderiniń ónerlerin kórsetti.
Kórermender «Saryarqa», «Shalqyma», «Birligimiz — qýanysh» aspaptyq ansamblderi, vokaldyq klassıka «Samal», «Qazaq eli» jáne Abaıdyń áıgili «Kózimniń qarasy» ánderi, sondaı-aq «Týǵan jerimniń bulttary», «Men seni súıem, Qytaı», «Tátti raýshan» men «Lanhýahýa» qytaı halyq ánderin tyńdady.
Sondaı-aq baǵdarlamada «Qyz syny» sán kórsetilimi, «Sulýlyq saltanaty», «Dala tynysy», «Rýh», «Myń tulpar tolqyny», «Hýanhe» jáne «Sý rýhy» horeografııalyq kompozıtsııalary soqpaly aspaptarda mánerlep oryndaldy.
Sharany Qazaqstan Respýblıkasynyń Mádenıet jáne aqparat mınıstrligi men Qytaı Halyq Respýblıkasynyń Týrızm jáne mádenıet mınıstrligi uıymdastyrdy.
Eske sala keteıik, 2026 jyl Qazaqstan men Qytaıdyń aralyq mádenıet jyly bolyp jarııalanǵan bolatyn. Eki el úshin jyl boıyna mádenı is-sharalardyń baǵdarlamasy josparlanǵan.
Aıta keteıik, Beıjiń bastaýysh mektebiniń oqýshylary Qazaqstan mádenıet ortalyǵyna bardy.